صرخة سيدة أمام محكمة الأسرة :جوزي عايزني أجهز له سجاير الحشيش واشرب معاه

"جوزي حشاش 24 ساعة مش في وعيه و عايزني أشرب معاه بانجو و أجهز له مع صاحبه سجاير الحشيش في قعدة الأنس بتاع كل يوم في شقتي وسط ولادي" بهذه الكلمات صرخة سيدة أمام محكمة الأسرة تستغيث من بطش زوجها "الحشاش" وتصرفاته بعدما طلب منها شرب مخدر البانجو معه و تجهيز سجاير الحشيش له و لأصدقائه في سهرات الليل وسط صغارها.

بعيون مليئة بالدموع ووجه شاحب تروي السيدة معاناتها مع زوجها الذي يتعاطى المواد المخدرة قائلة:من أول يوم جواز أكتشفت أن جوزي حشاش و بيتعاطى كل أنواع المواد المخدرة، اتجوزته صالونات مفيش حب بينا و لا لسه في عشرة تخليني اتمسك به، لكن خوفت أطلب الطلاق و أنا لسه عروسة المجتمع يدمرني بنظراته و رددت لسه متجوزه من أيام الناس تقول عليا ايه محدش هيصدق أن العيب مش فيا و أنا اللي طلبت الطلاق منه، فقولت أكمل معاه و أحاول أخليه يبعد عن التعاطي.

وتابعت السيدة :متجوزين من 10 سنين و انجبنا 3 أطفال، وخلال الفترة دي حاولت معاه بكل الطرق ابعده عن التعاطي و لكنه رفض و في مرات كان بيضربني لو ضغطت عليه، لما كنت بطلب منه يوقف التعاطي علشان خاطر أولادنا نعرف نربيهم كويس و يطلعوا يلاقوا أب صالح، يرد عليا "ده كيف" مش إدمان، ندمت إني كملت معاه و اني فكرت في تغييره، الأول خوفت من نظرت المجتمع و دلوقتي بقي معايا 3 أطفال حياتنا متدمرة.

وأردفت السيدة: الكارثة موقفتش عنده، جوزي طلب مني أكتر من مرة أشرف معاه بانجو ، كل يوم يجمع أصحابه في قعدة أنس كلها شرب و مسخرة و كمان عايزني أجهز لهم سجاير الحشيش وأخدم عليهم في القعدة ورددت مصدومة ازي هأمان على نفسي و شرفي و أولادي معاه، كل حياتي بتدمر قدام عنيا و مش عارفه أعمل حاجه، مش هسيب ولادي حياتهم تدمر زايي.

و واختتمت السيدة : قررت انفصل عنه و طلبت الطلاق أكتر من مرة، رفض يطلقني، ومستمر في ليالي الأنس و الشرب مع أصحابه كل يوم في شقتي، لجأت للمحامية نهى الجندى و أقامت دعوى طلاق للضرر و التي تحمل رقم 5476 أمام محكمة الأسرة بحلوان ، وقضت المحكمة بتطليقي منه وضم حضانة الأطفال.