زوج يستغيث بمحكمة الأسرة: ”مراتي مدمنة مشروبات غازية”

علت صرخات الزوج المغلوب على أمره داخل محكمة الأسرة، بعدما تركت زوجته المنزل وانتقلت إلى منزل أسرتها في أعقاب نشوب خلاف بينهما بسبب المشروبات الغازية، وردد: "مراتي هربت على بيت أهلها بعد ما خربت بيتي بتشرب مشروبات غازية كتير وأنا صاحب محل بقالة خلصت على رأس مالي.. وصلت لمرحلة الإدمان ومش عارف أعمل إيه".

وسرد الزوج معاناته مع زوجته على مدار سنوات: "اتجوزت وكنت عايش متهني مع زوجتي ومش مخليها محتاجة حاجة، عندي محل بقالة اللي بتحتاجه بتاخده مش براجعها.. لكن مراتي فجأة لقتها عجزت ومش قادرة على تنظيف الشقة ومش بتتحرك من مكانها إلا للضرورة، وكانت الصدمة لما عرفت إن عجزها بسبب المشروبات الغازية اللي دمرتها".

وأردف: "مراتي أدمنت المشروبات الغازية وعايزانى أخدمها.. حاولت معاها علشان تبطل المشروبات الغازية اللي بتخرب علينا حياتنا، كانت بتخبيها وتشربها بدون علمي، أنا مش فارق معايا إلا صحتها وحياتنا اللي بتدمر قدام عيني".

وتابع: "أنا وصلت لمرحلة صعبة معاها والطريق قدامنا بقى مسدود، هي مكملة شرب وأنا مش قادر استحمل ولا أكمل على الوضع دا، طلبت منها ننفصل بدون محاكم رفضت وهربت على بيت أهلها من 4 شهور، لجأت لمحكمة الأسرة بالتجمع الخامس وأقمت دعوى طلاق للضرر والتي تحمل رقم 1237 لسنة 2021 ولم يتم الفصل بها حتى الآن".