حنان أمام محكمة الأسرة :جوزي بيكره الصحيان بدري وقاعد بالهدوم الداخلية على الكنبة

"جوزي بيكره الصحيان بدري ،وكل ما ينزل شغلانه يترفد منها وبقي قاعد بالهدوم الداخلية 24 ساعة في على الكنبة" بهذه العبارات الحزينة بدأت حنان تروي معاناتها مع زوجها ورفضه الصحيان مبكراً و النزول إلى العمل.

بدأت حنان السيدة الأربعينية تروي تفاصيل معاناتها مع زوجها أمام محكمة الأسرة بالتجمع الخامس قائلة: بعد الجواز جوزي كان راجل مثالي طول الوقت شغال، مش بيخليني أحتاج حاجه وكل طلباتي مجابة، بعد فترة حاله اتشقلب و بقى بيرفض يصحى بدري ورددت بيقولي عندي عقدة من الصحيان بدري، بقى كل شغلانه ينزلها يترفد منها بسبب تأخيره كل يوم على ميعاد الشغل.

وتابعت حنان بعيون منكسرة:سبت البيت له أكتر من مرة علشان يغير من نفسه، كان يوعدني أنه هيتغير ولكن مفيش فايدة وضعه زي ما هو مش عايز يصحى بدري، و بقى قاعد من الشغل طول الوقت، حسيت الحمل تقل عليا و مش قادرة استحمل لوحدي ورددت خلاص بقى معتمد عليا وقاعد بالهدوم الداخلية 24 ساعة في البيت على الكنبة.

واختتمت حنان بعيون مدمعة :كان نفسي جوزي يبقى سند ليا ونكمل مع بعض لآخر العمر، لكن هو مصمم على النوم طول النهار و السهر طول الليل، أقامت دعوى طلاق للشقاق والتي تحمل رقم رقم 436 لسنة 2021 بمحكمة الأسرة بالتجمع الخامس.