نادية في دعوى خلع: ”جوزي بيضربني قدام الناس عشان يرتاح نفسيًا”

تقف نادية المرأة الأربعينية وعيونها مليئة بالدموع أمام قاضي محكمة الأسرة تروي له معاناة زواج 20 عاماً، تدمع عيناها في كل مرة تتذكر تعنيف زوجها أو إهانته لها أمام الجميع، وتجفف دموعها لتتذكر مشهد آخر، عندما كانت تعامله معاملة الملوك، ثم ينتهي الحال في كل مرة بضربها وطردها لبيت أهلها.

تقول "نادية": "عرفت جوزي من 20 سنة عن طريق أهلي وكان في إعجاب متبادل واتقدم ليا وأقنعت أهلي به وتم الجواز بعد فترة، كانت حياتنا سعيدة وكلها حب، قلبنا على قلب بعض وواقفين سند اللي يميل يسند على التاني، كل مشاكلنا وأزماتنا كنا بنحلها بحبنا القوي لبعض، بعد فترة اتحول الحب لخناقة وإهانة وتعنيف، فكل مشاكلنا بقت هي أكبر أزمة في حياتنا خلاص مبقاش فيه ثقة".

وأكملت: "جوزي بقى مقصر في شغله، وأجبرني أخلف أكتر من مرة، بقى عندنا 5 أولاد و هو شغله بمزاجه لحد ما اتفصل منه، نصحته أكتر من مرة يركز في شغله ويراعي ربنا في معاملتي أنا وأولاده، كان بيضربني قدام أي حد وأغضب عند بيت أهلي وأرجع ويتكرر نفس الفيلم".

وأردفت حديثها: "حياتي معاه بقت مستحيلة، خلاص كبرت وهو كبر على الضرب والإهانة كل يوم والفضايح قدام الناس، ويقولي أنتي مهملة في البيت وأنتي السبب في فصلي من الشغل بقت أنا شماعة بيعلق عليها فشله".

وأقامت نادية دعوى خلع ضد زوجها بعد 20 عام زواج أمام محكمة الأسرة والتى تحمل رقم 4174 ولم يتم الفصل فيها حتى الآن.