سيدة في دعوى خلع: ”جوزي خانني مع زميلته علشان بتعمله فطار”

وقفت "لبنى" أمام قاضي محكمة الأسرة بالتجمع الخامس، منكسرة بوجه شاحب تروي تفاصيل خيانة زوجها بعد قصة حب استمرت سنوات طويلة وانتهت بالزواج السعيد لمدة 12 عامًا أنجبت خلالهم طفلين، ووصفت كيف كانت لشريك عمرها خير الزوجة والعشرة الطيبة.

وبعيون حزينة، قالت السيدة للقاضي: "عرفت زوجي سنين طويلة قبل الزواج.. عشنا قصة حب جميلة انتهت بالزواج.. كنت براعي ربنا في معاملته والعشرة اللي بينا، وبعد كل الحب اللي قدمته له، وبعد عشرة 12 سنة زواج اكتشفت أنه بيخوني".

وتابعت "لبنى": "بالصدفة شوفت رسائل الواتس آب عنده، لقيت محادثة بينه وبين زميلته المتجوزة في الشغل، بيكلمها وبيتقابلوا، ولقيت صور ليهم مع بعض، لما واجهته حصل بينا مشاجرة عنيفة، وقاللي زميلتي بتعملي كل يوم الفطار أنتي لا".

وأردفت: "طلبت منه الطلاق أكتر من مرة رفض، حاولت أبعد عنه لكنه كان مصمم يتمسك بيا كأن مفيش حاجة حصلت، قررت أكلم زوج زميلة جوزي اللي بيخوني معاها أقوله يخلي مراته تبعد عن جوزي.. لكنه معملش حاجه ولا كأن في حاجة حصلت، روحت على بيت أهلي وقامت قضية خلع".

ولجأت السيدة للمحامية نهى الجندى، لإقامة دعوى خلع أمام محكمة الأسرة بالتجمع الخامس، والتى قررت محكمة أسرة التجمع، حجزها للحكم بجلسة 18 مارس الجاري.