عمرو سلامة: طارق العريان قال على شغلي إيه القرف ده

تحدث المخرج عمرو سلامة عن بداية دخوله مجال الإخراج، وبالإضافة إلى كواليس أول أفلامه وهو فيلم زي النهاردة بطولة آسر ياسين.

وقال عمرو سلامة في تصريحات تليفزيونية: وأنا عندي 19 سنة كنت ماشي بشنطة زي البوسطجي وأوزع أفلامي على كل الناس سواق تاكسي أو جرسون، وأقولهم دي أفلامي يمكن حد فيهم يعرف حد يوصلني بيه.

وأضاف عمرو سلامة: قابلت هاني عادل وعملت معاه أغنية اسمها أنتيكا، وروحنا بيها للمخرج طارق العريان أنها تتصور فيديو كليب، فـ طارق العريان قال أنت عايز القرف ده ينزل، ودي أحلى حاجة في طارق أنه مش بيجامل، والناس اللي شتمت شغلي هي الناس اللي عملت نبضات في شغلي.

وعن أول أعماله في السينما فيلم زي النهاردة، قال عمرو: جالي فيلم زي النهاردة وأنا في آخر يوم في امتحانات كلية تجارة، ومكنتش عارف أسامي الحاجات في اللوكشين، كلمت وقتها أمير رمسيس يقولي ايه أسامي الحاجات، وعملت الفيلم وأنا عندي 23 سنة.

أخر أعمال عمرو سلامة

ينتظر عمرو سلامة طرح فيلمه الجديد شماريخ، والذي من المقرر عرضه قريبًا في دور العرض بالسينمات، والفيلم من بطولة آسر ياسين، أمينة خليل، وغيرهم من نجوم الفن، والعمل من تأليفه وإخراجه.