إنجي علي: الست لو عايرت الراجل بيكون علشان هو عايرها.. ونصيحتي إنجاب الأطفال لازم يكون مدروس

تحدثت الإعلامية إنجي علي، عن تصريحها السابق بأن المرأة كل المجتمع، مؤكدة إنها قالت هذا التصريح في سياق مُعين وليس الغرض منه إثارة الجدل.

وقالت إنجي علي، خلال حوارها الإعلامي مع سعيد جميل، في برنامجه أنا سعيد، المذاع عبر شاشة قناة القاهرة والناس: لما قُلت التصريح ده كان بصيغة مُعينة ومكنش بالمعنى ده، لأني مؤمنة جدًا إن الراجل مهم لأنه أبويا وأخويا وابني، والست كمان مهمة ولما كل واحد بيعرف دوره بالضبط ده بيكون مهم، والمشكلة من وجهة نظري إن الأدوار اتغيرت واتلغبطت أوي للأسف الشديد.

وتابعت: لو الراجل بقى عليه حِمل تقيل والست بتساعده بقى هو خلاص مُعتمد إن ده إجباري إنها تنزل وتشتغل، ولكن هي بتساعده وفيه ناس واخدين ده حق مكتسب، ولو الست عايرت الراجل إنها بتصرف عليه علشان بيكون هو ضايقها وعايرها، لأ أنت اتجوزت لازم تبقى مسئول إنك تفتح بيت وأسرة.

ووجهت إنجي علي، نصحية للمقبلين على الزواج، قائلة: نصيحتي لـ ناس كتيرة أوي وفي ناس هتكون ضدي، إننا كبرنا على أن الست بتتجوز وتخلف وتكون أسرة، ولكن أنا بشوف النهاردة إن موضوع الأطفال في الجواز لازم يكون مدروس صح، ممكن نتجوز ومنخلفش ده مش فرض، لأن الطفل ده هيبقى محتاج وقت وطاقة وفلوس وحاجات كتيرة جدًا، فمينفعش إن ربنا يديك رزق كبير زي طفل وأنت تهمله أو تديه لـ دادا أنا ضد ده تمامًا الأم أم، والأب أب ولازم يكون موجود.

إنجي علي

أما عن حضورها أغلب المهرجانات السينمائية والدرامية، فعلقت قائلة: أنا بطلع في كل المهرجانات ومش كل المهرجانات باخد فيها فلوس، فيه بعض المهرجانات بتكون في التليفزيون المصري ومبيكونش فيه الميزانية اللي الناس متخيلنها.