إنجي علي: أنا ضد المساواة بين الرجل والمرأة.. ونزول الست للشغل بيخليها تهبش في أي حد بسهولة

أكدت الإعلامية إنجي علي، أنها ليست مع المساواة بين الرجل والمرأة، كما أنها ترى أن البحث والعمل على المساواة بين الرجل والمرأة هو أحد أسباب خلل المجتمع.

وقالت إنجي علي، خلال حوارها الإعلامي مع سعيد جميل، في برنامجه أنا سعيد، المذاع عبر شاشة قناة القاهرة والناس: أنا ضد المساواة بين الراجل والست، وأنا النهاردة شايفة إن ده أحد الأسباب اللي عمل خلل في المجتمع، موضوع إن الست طول الوقت بتطلب المساواة، والستات النهاردة أخدوا حقهن تالت ومتلت على جميع المستويات، ده من وجهة نظري وده رأيي، الحياة كلها آدم وحواء من بدء الخليقة.

وتابعت إنجي علي، موجهة نصيحة للسيدات اللاتي تحملن أزواجهن ما يفوق مقدرتهم المادية: بقول للستات اللي بيضغطوا على أزواجهم وبيطلبوا أكتر من قدراته يهدوا شوية والكلمة الحلوة بتفرق إحنا بقينا بخلاء حتى في الكلمة، وأقوى ست في العالم هي الست المصرية، لأنها ملهاش مثيل في أي حاجة، والناس بتحب الرجل المصري وخفة دمه.

إنجي علي

كما أكدت إنجي علي، أن خروج المرأة للعمل يبني شخصيتها بدرجة كبيرة قائلة: نزول الست للشغل بيخليها تهبش في أي حد بسهولة، وده حصل معايا لأني كنت شخصية خجولة ومبقدرش أقول لأ، لكن نزولي الشغل واحتكاكي بـ فئات مختلفة علمني إني أواجه.

وأضافت: أنا بحب الناس ومقدرش أعيش من غير الناس، وربنا إداني نعمة كبيرة جدًا وهي نعمة الأصحاب، وأنا بشوف دايمًا إن اللي عنده أصحاب كويسين في الزمن ده يبقى محظوظ.