أنوشكا: محدش زي وفاء عامر في الارتجال.. والظلم أكتر حاجة بتعصبني

كشفت الفنانة أنوشكا، كواليس تحضيرها لمسلسل راجعين يا هوى مع الفنانة وفاء عامر، مؤكدة أن معظم المشاهد بينها وبين الفنانة وفاء عامر معظمها مرتجلة.

وتحدثت الفنانة أنوشكا عن كواليس مسلسل راجعين يا هوى، وذلك خلال لقائها ببرنامج مساء dmc، حيث قالت: مسلسل راجعين يا هوى مش شعبي، ودايمًا المخرجين بيسكنوني في أدوار معينة، وغيرة الفنان بتخليه عايز يغير من نفسه، ومحمد سلامة كان ليه فضل كبير.

وأردفت في حديثها عن التعاون مع الفنانة وفاء عامر في مسلسل راجعين يا هوى، إذ قالت: مشاهدي مع وفاء عامر كنت مبسوطة برد الفعل عليها، ومعظم المشاهد مش مكتوبة، وكان فيه ارتجال كتير وليد اللحظة بيني وبينها، ولو وفاء فتحت في الارتجال محدش قدها.

وعن أصلها الأرميني وتأثيره عليها، أكدت أنوشكا: لو كنت ولد كان لازم أخش الجيش في أرمينيا، وليا جذور أرمينية زي ناس كتير جدًا، لكن أنا مصرية، وهند صبري ودرة توانسة وعمرنا ما نقول إن هما مش مصريين.

واختتمت حديثها عن الطريقة التي تتعامل بها مع الخلافات التي تتعرض لها، قائلة: أنا ست بمشي قانوني جدًا، ولو في حد بيضحك عليا إن هو مبيطبقش، لا بيطبق، ولازم مخشش بصدري عمال على بطال في الخلافات، وبالرغم عن ده أنا مش هادية خالص، ودلوقتي العصبية بقت من جوه، والظلم أكتر حاجة بتعصبني في الحياة.