«بسبب الكرش والشنب».. فيدرا تكشف كواليس خلافها مع أحمد زكي في «البطل».

كشفت الفنانة فيدرا عن كواليس اختيارها لفيلم «أرض الخوف»، موضحة أن المخرج داود عبدالسيد اختارها بعد عملها في مجال «الموديلز».

وأضافت فيدرا في لقائها مع الإعلامية لميس الحديدي في برنامج «كلمة أخيرة»، على قناة «on e»: «المخرج داود عبدالسيد اختارني في أرض الخوف بعد عملي في مجال الموديلز، وقابلني وإداني ورقتين وقاللي روحي ذاكريهم وتعالي، فروحت لسامح الباجوري وقاللي عملت إيه مع داود؟ قولت له الراجل ده حاجة محصلتش، عملت المشهدين، وبعدين كلموني وقالولي تعالي امضي الفيلم».

وتابعت: «وقتها، كنت مصممة ملابس في فيلم البطل، وكنت متخانقة مع أحمد زكي خناقة كبيرة بسبب اللبس، فحصل إني مضيت فيلم أرض الخوف فمثلنا مع بعض فكانت حاجة تضحك».

واستطردت: «خناقتنا في فيلم البطل كانت بسبب إني لازم أحط له كرش وشنب، وهو عايز يا الكرش يا الشنب، فقولت له: إنت حر، أدي الكرش وأدي الشنب، وتركته، فبدأ يزعق، واتخانقنا خناقة كبيرة على البحر، وكانت خناقة كبيرة جدًا، وكنت بقوله: متكلمنيش بالطريقة دي، وكان العربي بتاعي مش قوي جدًا، فكنت أتعصب وأتكلم إنجليزي على طول».

وأردفت: «أول يوم لي في تصوير فيلم أرض الخوف، كنت قاعدة مرعوبة في أوضتي بسبب خلافنا، فدخل زارني في الأوضة، واحتوى غضبى تمامًا وشالني في الفيلم حقيقي».