بيطفي السجاير في جسمها.. ماذا قالت شقيقة المتهم بقتل زوجته بالزاوية الحمراء؟… خاص
حصلت "جريدة النهار المصرية"، على نص التحقيقات في قضية مقتل سيدة تدعى "سهام"، ضربًا بالمطرقة على يد زوجها داخل منزله في منطقة الزاوية.
وننشر أقوال "ياسمين"، شقيقة المتهم الذي أنهى حياة زوجته بعد 21 عامًا من الزواج، بسبب تعرضه لحادث تسبب في قطع نخاعه الشوكي وإصابته بعجز في ساقيه.
وإلى نص التحقيقات:
س/ ما هي علاقتك بالمجني عليها وهل يوجد خلافات بينكما؟
ج/ هي مرات أخويا وأعرفها من 22 سنة وأقرب واحدة ليا وزي أختي وأنا متجوزة أخوها ومفيش خلافات بيننا.
س/ ما هي معلوماتك بشأن الواقعة محل التحقيق؟
ج/ العلاقة بين أخويا ومراته كانت كلها خلافات بينهم لأن هو قبل الحادثة كان متحكم فيها جدا وعلى طول بيزعق لها وبيهينها وميخليهاش تخرج من البيت من غير إذنه وكمان أخويا كان بيشتغل يوم وعشرة لأ وكان فيه خلافات كتير بسبب الماديات بينهم، وبعد ما حصلت الحادثة لأخويا الخلافات المادية بينهم زادت عليه وبقا يحس إن ملهوش كلمة على مراته وأنها بقت حرة وتعمل اللي هي عايزاه من غير إذنه وبقى على طول شاكك فيها وهي كانت بتخرج من البيت عشان تجري على رزقها عشان خاطر عيالها وعشان جوزها بقى عاجز.
س/ وما تفصيلات معلوماتك عن الخلافات بين شقيقك والمجني عليها؟
ج/ أخويا بعد الحادثة كان فيه ناس كتير بتساعده وأنا عملت له المعاش بتاع والدتي ولما القرش بقا يكتر في إيده بدأ يتعاطى حشيش وتامول ولما الناس عرفت في المنطقة بقوا يدوا فلوس المساعدات لمراته عشان ميصرفهاش على المخدرات، ولما عرف بقا يعتدي عليها بالضرب وهي كانت بتحكيلي أنها خايفة أنه يموتها لما قالها في خناقة أنتي قويتي عليا وأخرتك هتكون على إيدي، ومرة كمان كانت نايمة على الأرض وهو ضربها بالعصاية على دماغها وجسمها عشان يصحيها، وكانت بتصحى تلاقي مطفى السجاير في جسمها.
س/ وهل سبق للمتهم اكتشاف أي شبهات في سلوك المجني عليها؟
ج/ المجني عليها كانت ست محترمة وبتجري على عيالها وعلى بيتها وكانت عايشة في بيت أبوها ومستحيل تعمل حاجة غلط وكانت قاعدة مع صابر كل يوم في أوضته ولما هددها بقت بتبات عنده يوم آه ويوم لأ.
س/ وهل سبق للمتهم أن أفصح لك عن رغبته في إيذاء المجني عليها؟
ج/ أنا في مرة كنت بزوره وكان بيشتكي لي إن هي مش بتجيله غير على النوم بس وقالي أنا مرتب حاجة في دماغي يا هي تموتني يا أنا هموتها.
س/ ما قولك فيما جاء بأقوال المتهم أنه وضع شاكوش في مرقده للاعتداء على المجني عليها؟
ج/ مش فاكرة أنه قالي حاجة زي كدة بس هو قالي يا أنا هموتها يا هي هتموتني.
س/ وما قولك في أن المتهم قد ذكر أن المجني عليها أخبرته بأنها على علاقة بغيره؟
ج/ لا المرحومة كانت بتحكيلي أن زوجها كان دايما شاكك فيها بسبب عجزه وبيحاول يخليها متبصش برا ولكنها كانت بتقوله أنا عمري ما هبص برا وراضية بقضاء ربنا.
.jpg)
