لو اتكلمتي هندبحك .. نص التحقيقات في قضية مقتل عامل على يد شقيقين بمنشأة ناصر| خاص

حصلت "جريدة النهار المصرية"، على نص التحقيقات مع الشقيقين "صلاح.م"، و"رمضان.م"، على خلفية اتهامهما بإنهاء حياة عشيق والدتهما وتقطيع جسده لعدة أجزاء وحرقها داخل منزله في منشأة ناصر.

وننشر نص اعترافات الشاهدة "أسمهان"، زوجة أحد المتهمين، أمام جهات التحقيق، والتي أكدت أن زوجها وشقيقه أنهيا حياة صديقهما بعد علمهما أنه على علاقة غير شرعية مع والدتهما.

وإلى نص التحقيقات:

س/ ما هي صلتك بالمتهمين؟

ج/ صلاح يبقا جوزي ورمضان يبقا أخوه.

س/ وهل توجد أية خلافات زوجية بينكما؟

ج/ لأ مفيش غير الخلافات العادية.

س/ ماهي معلوماتك بشأن الواقعة؟

ج/ اللي حصل أني عايشة في البيت مع جوزي ومعانا في نفس البيت أخته رشا وأخوه رمضان وأمهم، وكان معانا عرفة صاحبهم بيعتبروه أخوهم وبيسهروا معاه كل يوم، وأمهم بتعتبره واحد من العيلة وكل يوم بتطلعله مياه سخنة بعد لما بيرجع من الشغل وبعدها بينزل يتعشى معاها ويسهر مع صلاح ورمضان، وقبل ما عرفة يتقتل بكام يوم قالي ملكيش دعوة بأنور أخويا عشان مطلع عليكي سمعة وحشة.

س/ وما الذي حدث في أعقاب ذلك؟

ج/ يوم ما عرفة اتقتل لقيت صلاح جاي بيودعني بيقولي كان نفسي أجوز بنتي بس أنا سايبك تربيها وأنتي معاكي دهب ابقي بيعيه واصرفي منهم على نفسك وبيتك ووقت ما فلوسك تخلص اطلبي من رمضان، ووقت لما فبوسه تخلص اطلبي من عرفة ده أخوكي الكبير وبعدها بدت صوته يروح ويقول هاتولي عرفة.

س/ وما الذي وقع إبان ذلك؟

ج/ عرفة جه ومعاه ازازة مياه مقري عليها قرآن وصلاح قاله لأ، وطلب مني أدخل جوا أنا وأخته وسمعت صلاح بيتخانق مع عرفة و بيقولوا قصدك إيه وخدوا بعضهم وراحوا على شقة عرفة اللي قعد يقول والله ما قصدي حاجة وصلاح ورمضان عمالين يشتموه شتايم وحشة وسامعة صوت خبط جامد وضرب وعرفة قعد يقول الحقوني بموت، بعدها جوزي طلع قالي أنا قتلته خلاص وطلب مني أكل وغير هدومه لأن كان عليها دم ونزلوا تاني وجابوا سكاكين غرقانة دم وأنا رفضت أغسلها وزعقوا لرشا أختهم عشان تغسلها وخبوها تحت فرن البوتجاز وهددوني لو اتكلمت هيدبحوني.

س/ وما الذي حدث في أعقاب ذلك؟

ج/ أنا حاولت أهرب معرفتش واجبروني أني اشتري دهان للحيطة واحطها في شنطة سودا عشان يبيضوا الشقة عشان الدم ميبانش وجوزي قعد يضرب فيا لما رجعت وبعدها روحت لأمي ومقولتلهاش لحد ما هو كلمها وقالها خلي بنتك ترجع.

س/ وما هي طبيعة علاقة المتوفي بوالدة المتهمين؟

ج/ اللي أنا اعرفه أن أول ما عرفة بينزل عندها رشا بنتها بتطلعلي تقولي إن أمها بتتزوق قدام المراية.

س/ وهل وقفتي على وجود خلافات بين المتهمين ووالدتهم؟

ج/ قبل ما يقتلوا عرفة حماتي طلعت عندي وهي قليل ما بتطلع عندي وجوزي لما شافها اتعصب وقالها قولي اللي في نفسك يا أمي وهي قالتله أنت بتخوفني وأغمى عليها وهو قال دي أمي وبتمثل وعارف حركاتها.

س/ وهل كان باستطاعة المتوفي الدفاع عن نفسه؟

ج/ اللي أعرفه أنه كان قوي وممكن يضربهم هما الاتنين بس اللي فهمته من الصوت أن معاهم عصيان وشوم لأن الضرب كان صوته عالي.

س/ وما هو الوقت المستغرق في التعدي على المتوفي؟

ج/ هما قعدوا يضربوا فيه من 8 أو 9 بليل لحد 2 الفجر.

س/ وكيف وقفتي على ذلك؟

ج/ عشان عرفة كان بيصرخ جامد وبيتألم وبيقول إلحقوني.

س/ وما هو توقيت الانتهاء من التعدي على المجني عليه؟

ج/ على الساعة 2 الصوت وقف ولقيت جوزي جه ووشه مخطوف وأخد ازازة ريحة ومشي.

س/ وهل تناهى إلى مسامعك صوت المجني عليه في ذلك الوقت؟

ج/ لا أنا مسمعتش أي صوت ليه تاني وبعدها بنص ساعة لقيت جوزي بيقولي هقتلك زي ما قتلتيه وبيتهمني إن فيه بيني وبينه حاجة وأنا قلتله حرام عليك أنت قتلت راجل بريء.