الأحد 2 أكتوبر 2022 04:14 مـ 7 ربيع أول 1444 هـ
جريدة النهار المصرية رئيس التحريرأسامة شرشر

فن

غلطانة.. بهاء الدين محمد: لو ليا كلام على شيرين مش هخليها تنطق

علق الشاعر بهاء الدين محمد على تصريحات الفنانة شيرين عبد الوهاب التى سخرت فيها من الموسيقار الراحل حسن أبو السعود خلال مداخلتها الهاتفية مع الإعلامية لميس الحديدي في برنامج “كلمة أخيرة”.

وكتب بهاء الدين محمد عبر حسابه بموقع فيسبوك :" #حسن_أبوالسعود ,حبيبى اللى عمرى ما حسيت إنه مش ف الدنيا واللى كل الوسط بيحبه وكان وجوده ف أى مكان بيعمل حاله من البهجة بروحه الطيبة وقلبه اللى كله حب وفن ,الفنان اللى عملنا مع بعض نجاحات عايشه لحد النهاردة ومنها #أسفحبيبتى #لماالنسيم #فىناس #أصعبحب #وعداالليل #عماليحكيلى_عنها
ومئات الأغانى اللى كان بخبرته ف اللايف بيعرف يجيب الجملة اللى الناس تحبها وبالفعل سيطرنا سنين على الساحة الغنائية وغيرنا كتير . ده غير أنه كان من أفضل العازفين على الأوكرديون ف العالم ".

وأضاف بهاء الدين محمد :"و ف يوم من الأيام وهو نايم تعبان لقيته إبتسملى وسألنى أنت عارف مين أكتر حد ح يزعل عليا لما أموت ؟ قولتله إسم من أسماء ولاده . قالى لأ أنت أكتر حد ح يزعل عليا وبالفعل أنا مابقيتش حتى أمشى من شارع بيته وفضلت فترة طويلة أنسا أنه مات لأنه عشرة فن وحياة . وكان بيحبنى كأنى إبنه وكان بيفرحلى بكل نجاح حتى لو مش معاه وح أبقى أحكيلكم إزاى إتقابلنا لأن الموضوع ده مهم .".

وتابع بهاء اليد محمد :"والمهم علشان أقول اللى ضميرى بيحسه ف موضوع #شيرين_عبدالوهاب واللى جهات كتير عايزنى أقول رأى ف كلامها عنه او وصفها أنا بكل صراحه بأقول ماحستش إنها قاصده تهينه ولا تسخر منه هى بس إستدعت سيرته بشكل يبدو ساخر لكن أنا رغم إنى متضايق منها وهو عندى من أغلى الناس إلا إن إحساسى قالى إنها ماتقصدش .
لأن فعلا لما كنا بنتقابل كان بيحتفل بشيرين وبيحب فنها و البساطه اللى فيها وهى كانت بتحبه وتحترمه .
وللعلم أنا لما كنت بأروحله وشبعان ومش طايق أشوف أكل اول ما يقولى تاكل بأداء ماشوفتش زيه بألاقى نفسى بأجوع
الله يرحمه كان فنان ودمه خفيف وقلبه قلب طفل ".

واختتم بهاء الدين محمد :"بس هى غلطانه إنها بتطلع تتكلم !!! ولو ليا سلطة عليها مش ح أخليها تنطق لا على مسرح ولا لقاء ولا حتى ف حياتها الشخصية . #أسكتىي يا شيرين".

أزمة شيرين وبهاء الجين محمد

قت الفنانة شيرين عبد الوهاب، عن أزمة أغنية ماتجرحنيش" مع الشاعر بهاء الدين محمد.

وقام أحد المتابعين بسؤالها عبر انستجرام، قائلاً: “إيه رأيك في كلام بهاء الدين محمد؟” لترد قائلة :" بصراحة مش شايفة ليه اي مبرر".

وكانت الفنانة شيرين عبد الوهاب، قد أثارت حالة من الجدل الواسع عندما صرحت عبر حسابها على موقع التواصل الاجتماعى انستجرام بندمها الشديد على أغنية “ماتجرحنيش” للشاعر بهاء الدين محمد.

وأغضب تصريح شيرين عبد الوهاب الشاعر بهاء الدين محمد والذى قرر ان يهاجمها بقوة عبر صفحته على موقع التواصل الاجتماعى فيسبوك ونرصد فى التقرير التالى القصة الكاملة لازمة شيرين عبد الوهاب وبهاء الدين محمد.

البداية كانت مع الفنانة شيرين عبد الوهاب التى وجهت لها سؤالا عبر حسابها على انستحرام من احد متابعيها عن اغنية ندمت على تقديمها لترد قائلة : “اغنية ماتجرحنيش” للشاعر بهاء الدين محمد.

بهاء الدين محمد وشيرين عبد الوهاب

وهو الامر الذى اثار غضب الشاعر بهاء الدين محمد والذى قرر يرد عليها عبر صفحته على فيسبوك : "مش متعود أرد على أى حد . ولكن لما حد يتجاوز حدوده لازم يقف مكانه ويعرف إنه مهما إتعود يغلط لازم ييجى عند بعض الأسماء ويحاسب ويخلى باله وخاصة لما حد ف كل كارثة يدافع عنها !!!" .

وتابع بهاء الدين محمد : وحأتكلم بإختصار جدا : المشهد الأول : ..أول يوم دخلت شيرين عبدالوهاب مكتبى كانت مع الأستاذ نصر حروس اللى هو صاحب الفضل ف تقديمها وبعد دقائق من اللقاء لقينا شيرين بتبكى وسألها نصر بتعيطى ليه ردت علشان أنا قاعده مع الأستاذ بهاء !!!" .

واضاف بهاء الدين محمد والمشهد الثانى : رشحتها تغنى كتير بنعشق ولولا موافقة نصر إحتراما للعشرة اللى بنا ماكانتش ح تغنيها لأنها كانت موقوفه من النقابة

واوضح بهاء الدين محمد : المشهد الثالث .. لما فوجئت بمدير أعمالها الرجل اللى أنا بأحبه وبأحترمه لقيته بيكلمنى نيابه عنها ويقولى سمعنى الجديد وده طبعا خطأ لأن اللى بيغنى مهما كان إسمه مش المفروض يغلط غلطة زى دى !!! لأن المشهد ده مش لايق على المشهد الأول.

وأشار بهاء الدين محمد الى المشهد الرابع والأخير : أغنية ماتجرحنيش أنا لحد الأن مش عاجبنى غُنا شيرين مع إحترامى الكامل لصوتها وأكيد لولا الأستاذ نصر ماكانش ح يتم اللقاء . ، وماتجرحنيش من أهم أعمالى ومن حقى أدافع عنها نتاج تهور اللى غنيتها "