بعد وصوله سن 60.. عمر طاهر: محمد فؤاد مغامر ومجدد وجريء

نشر المؤلف عمر طاهر ، تعليقا عبر صفحته على موقع التواصل الاجتماعى فيسبوك ، يتحدث فيه عن تجربة محمد فؤاد فى عالم الغناء بعد وصوله إلى سن 60.

عمر طاهر

وقال عمر طاهر : بمناسبة وصول محمد فؤاد لسن ٦٠ أعتقد دي مناسبة لزملائنا نقاد المزيكا الشاطرين إنهم ينصفوا تجربة فؤاد و هي فعلا متعبية كلام و أفكار.

وتابع: سيب آخر كام عمل وهاته من الأول هتلاقيه في منطقته كان مغامر و مجدد وجريء أكتر من منافسه الأشهر.

وأضاف عمر طاهر : هو أول اللي اشتغلوا مع عصام عبدالله، وياسر عبد الرحمن، وفهد ومدحت الخولي، وأحمد منيب، ومودي الإمام، هو اللي قدم وليد سعد محمد رحيم مصطفى عوض عزيز الشافعي تامر عاشور.

واسترسل: الوحيد في جيله اللي كانت انطلاقة نجاحه من غير حميد الشاعري اشتغل معاه بعدين.

وأوضح عمر طاهر : الوحيد في جيله اللي خاض تجربة جريئة ألبوم كامل مع احمد الحجار. إزاي صوته وهو بيقول يا ليل بقى فاصل اذاعة الاغاني المصرية هو و ماحدش غيره من جيله. مواضيع أغانيه ماوقفتش في حتة واحدة .. فيلمين مع مخرج كبير زي خيري بشارة و فيلم غير خريطة السينما مع هنيدي .. طلع من الفلكلور غنا و قدم تترات بقت تفصيلة في اسماع الناس.. طبيعة نظرة الناس ليه و شكل الحتة اللي سكنوه فيها.

واستطرد: تجربة مليانة كلام و كتابة و حاجات يتقدر تعبه فيها و حاجات فكت منه طبعا زي أي حد، بس إجمالا تجربة تستحق التقدير و تستحق انها تتحط في مكانها بالضبط وإن حد ينتشلها من منطقة اللطافة والقلش وكام عمل مش قد كدة ما يلغوش اللي الراجل أنجزه بالفعل.. كل سنة و انت طيب يا فؤش.

عمر طاهر

جدير بالذكر أن الكاتب عمر طاهر من مواليد سوهاج ١٩٧٥، حاصل على بكالوريوس التجارة وإدارة الأعمال من جامعة حلوان ١٩٩٨، وله العديد من الإصدارات والملفات فى مجالي الأدب والسينما منها: بعدما يناموا العيال، كحل وحبهان، من علم جمال عبدالناصر، شرب السجائر، كتاب المواصلات، إذاعة الأغانى: سيرة شخصية للغناء؛ صنايعية مصر "جزءان".