نسمة محجوب تنعى محمود اللوزى.. وعمر السعيد: شكلت وجدانى وأفكارى

استرجع الفنان عمر السعيد، ذكرياته مع الفنان محمود اللوزى، الذى رحل عن عالمنا اليوم وهو والد الفنانة يسرا اللوزى، وكتب عمر السعيد عبر حسابه على إنستجرام، قائلاً: "يوم حزين على كل حبايبك يا محمود أفتقد اليوم استاذى ومعلمى الكبير وأفضل مخرج مسرحى ومدرب تمثيل فى مصر فاكر ضحكتك الحلوة وهزارك وفاكر لما كنت بعصبك وتقعد تطير فى الكتب منى ومن اللى بعمله طب فاكر يوم ما قولتلك أنا كل مسرحية بعمل اختبار ومبتاخدنيش.. تقولى عادى مفيش دور ليك وبلاش دوشة".

وتابع:" فاكر يوم ما عملنا مسرحية ايزيس حبيبتى وكانت الناس بتضحك ويصقفوا على مشاهد ليا ودا لو تعلمون أمر ممنوع وعظيم فى مسرح الجامعة الأمريكية وبعد العرض تقولى بطل شغل التجارى ده وبكره ما تقولش حرف زيادة عن النص طب فاكر لما كلمتك وجيتلك البيت وقولتلك فيه مخرجة اسمها كاملة ابو ذكرى العاملة فيلم ملك وكتابة وكان خطير وقتها وعاملالى اختبار بكره وعايزك تمرنى على اختبار التمثيل لفيلم اسمه واحد صفر".

وأضاف: "محمود يا حبيبي جمايلك وطيبة قلبك وذكرياتنا سوا عمرها ما هتتنسي، ذكرياتنا كتيرة وحلوة سوا يا حبيب القلب، أنت شكلت وجدانى وأفكارى ومش أنا بس لا، ده جيل كامل من تلامذتك، هتوحشنا آه بس أنت موجود جوا كل واحد فينا بحبك يا لوزى وخالص عزائى لسوسن وأحمد ويسرا".