أصعب 5 سنين عدوا.. ياسمين غيث تكشف معاناتها مع مرض السرطان

شاركت الفنانة ​ياسمين غيث،​ فرحتها مع متابعيها عبر صفحتها الخاصة على موقع التواصل الإجتماعي بعد مرور أول خمس سنوات لعلاجها من السرطان .

ونشرت ياسمين غيث، صورة وهي تحمل لافتة كتب عليها: "5 سنوات، تمكنت من مرض السرطان".

وعلقت ياسمين غيث قائلة: "خمس سنين حياة على كف عفريت زي ما بيقولوا.. اللي اتقال لي إن أول 5 سنين هم أكتر وقت حرج، ولازم نتابع علشان السرطان مايرجعش".

وأضافت ياسمين غيث: "لسة مش مصدقة، مش عارفة حصل إزاي.. وعدوا بصعوبة.. قوي.. ولسه لغاية دلوقتي بفتكر، بنهار، بحلم بكوابيس إنه رجع تاني وبصحي أصرخ وأعيط وأقول مش عايزة يحصل لي كدة تاني والنبي يا رب.. بخاف، بعمل كشف كل 6 شهور.. كل مرة نفس الإحساس ونفس الخوف موضوع مش سهل تماما..".

وعن شعورها بالأمان بعد الإنتصار على السرطان، أكدت ياسمبن غيث أنها تشعر بالخوف دائماً وقالت: "عدم الإحساس بالأمان اللي كنت حاسة بيه زمان وواخداه .. وبالتاكيد كل مرة الدكتور بتاعي يقول لي ما تخافيش، لو عدا أول خمس سنين من غير ما ييجي تاني يبقي بإذن الله مش هييجي تاني.. وجه اليوم ده، بعد خمس سنين، من يوم ٦/٩/٢٠١٦.. اليوم اللي عرفت فيه إني عندي سرطان واليوم اللي عملت فيه العملية واتولدت من جديد".

أما بالنسبة للمعاناة التي عاشتها فقالت: "عديت بإيه؟.. عديت بحزن، ألم، وقت صعب، جنان وتشتت، عدم سيطرة على مشاعري وتصرفاتي، فقدان أمل، كره، حب، فرحة، تغيير، خناق، زعل، ناس بعدت.. قوي، وناس تانية قربت، وناس قربت وبعدين بعدوا، عصبية، غضب، عدم تقبل لنفسي، أرق وعدم راحة، إحساس إني حد ماعرفوش.. اتغيرت!".

وتابعت: "بقيت أقوي وواثقة من نفسي أكتر، بقيت بساعد غيري وبدي اللي حواليا أمل!.. حبيت كل حاجة أكتر من الأول ومسكت في الحياة أكتر وابني روح قلبي كان أملي إني أكمل وأعيش علشان ماكنتش قادرة أقبل فكرة إني ماشوفوش بيكبر".

فاضلي سنتين وأخف:

واختتمت غيث حديثها قائلة :"ألف حمد وشكر ليك يا رب عدد كل حاجة خلقتها، ماهما شكرتك وحمدتك وعملتلك، عمره ما هيبقى كفاية! شكراً إني لسه عايشة وبعافر.. شكراً على أكبر نعمة في حياتنا، اللهم ديم علينا جميعاً يا رب نعمة الصحة، أصعب 5 سنين عدوا، فاضل 2 علشان أخلص بقية علاجي.. أيوه علاجي لمدة 7 سنين".