حلا شيحة تهاجم تامر حسني بعد طرح أغاني فيلم «مش أنا»: خلف وعده معايا

هاجمت الفنانة المعتزلة حلا يشحة، الفنان تامر حسني، وذلك بعد طرحه أغنية من فيلم «مش أنا» آخر أفلامها، ويحتوي الكليب الخاص بها على مجموعة مشاهدة رومانسية من الفيلم تجمعهما، معلقة: «تفاجئت بنزول الكليب وفي أيام ذي الحجة المباركة.. خصوصا بعد وعد تامر ليا وتأكيده أنه حيحترم رغبتي»، وذكرته بفيديو يقول فيه إنه لا يريد أن يموت وهو مطرب.

ونشرت حلا عبر حسابها الرسمي على موقع «إنستجرام»، صورة للفيلم، معلقة: «أنا اتفاجئت جدا بنزول كليب يجمع فيه مشاهد متفرقة من الفيلم، وفي أيام ذي الحجة أيام مباركة وخصوصاً بعد آخر بوست نزلته ووضحت فيه أنا إيه».

وتابعت: «واتفاجئت أكتر خصوصا بعد وعد تامر حسني ليا وتأكيده أنه حيحترم رغبتي وبعض الطلبات اللي طلبتها منه بكل احترام وود الصيف اللي فات وأكد لي أنه حيحترم رغبتي».

وأضافت: «إحنا يمكن نجحنا بمقايس الدنيا بس صدقوني بمقايس ربنا إحنا لم ولن ننجح أنا عارفة ومتأكدة أن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح».

وأوضحت: «بتكلم من قلبي الكليب ده ميرضيش ربنا وأنا عيطت لأني شفت نفسي في المشاهد دي.. دي كانت زلة نتيجة ظروف مريت بيها وكلنا بنغلط ولازم نغلط علشان إحنا بشر بس المصيبة إننا بنغفل وبننسى».

وقالت: «أنا مش حتكسف من حد أنا تُبت من المشاهد دي وهي لا تصح وأنا غلطت وبصلح وأهم حاجة أن ربنا يرضى عني لأن في الآخر ده اللي حينفعنا مش الشهرة ولا النجاح لا هو مش نجاح أصلا علشان النجاح الحقيقي حاجة تانية خالص إحنا أغلبنا ناسينها إلا القليلين منا.. الفن لو بيخلينا نبعد عن منهج ربنا ومنبقاش قدوة لولادنا يبقي باطل وميبقاش فن».

ووجهت لتامر نصيحة قالت فيها: «إحنا كلنا عندنا امتحان في الدنيا دي وحابة أفكرك بالفيديو ده يا تامر اللي قولت فيه أنا مش بتمنى أموت وأنا مطرب أنا دايما خايف من كده.. كلام أكيد قولته في لحظة صدق جواك وجوانا كلنا.. شوفه تاني يمكن يفكرك أن جواك أكيد في صراع وأنا وكلنا بنغلط بس المهم في الآخر نتدارك الغلط ونصلح .{إِلَّا مَن تَابَ وَءَامَنَ وَعَمِلَ عَمَلا صَـٰلِحا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰت وَكَانَ ٱللَّهُ غَفُورا رَّحِیما}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد».

وكانت الفنانة حلا شيحة، أعلنت اعتزالها الفن مجددا، بعد أيام من طرح فيلم «مش أنا»، وذلك بعد زواجها من الداعية الديني معز مسعود، مشيرة إلى أنها قررت الاعتزال بعد تصوير الفيلم، وأنه تم تصويره منذ أكثر من عام.

فيلم «مش أنا» بطولة الفنانين تامر حسني، وحلا شيحة، وماجد الكدواني، ومحمد عبد الرحمن، وسوسن بدر، وإياد نصار، وشيرين، وغيرهم، والفيلم من تأليف تامر حسني وإخراج سارة وفيق.