اتنجمت وادتهم على قفاهم.. كواليس الأزمة بين مها أحمد وأبطال نسل الأغراب
أثارت الفنانة مها أحمد الجدل بعد تصريحاتها النارية التي كتبتها عبر حسابها بموقع التواصل الاجتماعي فيس بوك، حيث قالت مها: "عوضي على الله دي الجملة اللي دايما بقولها، لما تتصدم في أشخاص، الحكاية يا سادة عن نجمين عملوا مسلسل واتنجمت عليهم بنوتة لسه ألف باء تمثيل وادتهم على قفاهم".
تابعت: "ركبت عليهم إلى أن أصبحت بطلة المسلسل وبطلة الدعاية للمسلسل وهما راضيين رغم إن طول عمرهم ما بيعملوش كده مع أى زميلة لهم أقربها أنا".
وأضافت: "النجم الأولاني بيني وبينه عيش وملح وزمالة رشحت في مسلسل بطولته وكان بيقنعني بدور، ولما وافقت بعتولي دور تاني ما عرفوش دور، ما تعملوش واحده مبتدئة المفروض إنه عارف قيمتي الفنية".
وتابعت مها: "لكنه اتهرب مني وما وقفش جنبي وباعني رغم إن الكل عارف إني زي أخته (ندل) أما التاني كان في بداياته يتمنى يسلم عليا ويقول لي يا أستاذة نزلت من نفسي وقلت له مش هنشتغل مع بعض ما هي الحوجة مرة".
أضافت: "رد وقال لي الدور بينادي صاحبه، طبعا محكلكوش قد إيه ندمت نفسي وعشت أسود أيام حياتي عياط واكتئاب وقلت (عوضي عليك يا رب).
استكملت: "تمر الأيام والاتنين يعلوا ويتجمعوا مع بعض في مسلسل واحد (على عينهم طبعا) ويمثلوا وحش قوي تمثيل الكفار وطلعوا كمان ما بيقروش اللي بيمثلوه وربنا يركب عليهم بنوتة سنة أولى تمثيل وخبرة ويتحول المسلسل والدعاية كاملة لصالحها وهما (مخدماتية للأستاذة)".
وأضافت: "يمهل ولا يهمل ابدأوا من جديد يا أوفر تمثيل يا اللي ما بتقروش يا كومبارس جنب النجمة، نصيحة بلاش تتشطروا على اللي كان بينكم وبينهم عيش وملح بلاش تتشطروا على أساتذتكوا (عوضنا على الله) يا رب ما تحوجنا لحد حتى ولو كان أقرب الناس لينا.
