ياسمين حمدي الفخراني: «بابا بريء.. وعلاء حسنين عملّه سحر»

أكدت الدكتورة ياسمين الفخراني، ابنة المهندس حمدي الفخراني، البرلماني السابق المقبوض عليه لاتهامه في إحدى قضايا الفساد في تغريدة لها على موقع التواصل الاجتماعى "فيس بوك"، أن والدها بريء من تلك التهمة، وأن أحد موظفي شركة النيل لحليج الأقطان بفرع المنيا قال لها في مكالمة هاتفية: "مش بعيد علاء حسنين يكون عمل لباباكي حاجة وخلاه مش في وعيه أو سحر له". 
وقالت نجلة الفخراني، إنها اتصلت بوالدها وعلمت أن "الشخص ده هو اللي عملّه الكمين وهو النائب السابق علاء حسنين "بتاع العفاريت"، اللي طلع مع ريهام سعيد" أول مرة أشوفه والله". 
وأضافت أنه من فترة قريبة كان هناك اتصال من حسنين مع بابا وشاف الفوط اللي بابا كان عاملها وبيوزعها احتفالا بمناسبة افتتاح قناة السويس، وعليها شعار القناة فعجبته وقالّه يعمله زيها "وحصل فعلا". 
وأضافت أن "والدها كان قاعد مع المحامي بتاعه ومعرفش اتقابل مع حسانين ده فين فحسانين عزمهم وقاللهم تعالوا نتغدى عندي في الشيخ زايد " في فيلا حسانين" ففوجئوا هناك بصموئيل ده وبالشنطة وبالمباحث لافتة أن " يعني الشنطة دي ما اتمسكتش في بيتنا ولا عربيتنا ولا في أي مكان يخصنا دي عند علاء حسانين في بيته وتسالت ليه ما استنوش لما بابا ياخدها ويمشي بيها ويمسكوه بعدها في عربيته أو في بيتنا". 
وقالت إن "الحكم بعودة النيل لحليج الأقطان لملكية الدولة هو حكم نهائي وصادر من فبراير الماضي، فبابا بيساوم على إيه وإزاي أصلاً وفي حكم نهائي ومن سبعة شهور، وكنا ساومنا للتنازل عن القضايا اللي لسة شغالة زي عز الدخيلة ومنجم السكري وبالم هيلز والمصرية الكويتية مش على حاجة خلصت أصلا وصدر فيها حكم نهائي!!". 
وأشارت بقولها "ولما احنا بنبتز الناس بالقضايا دي ما اتنازلناش ليه عن أي قضية تانية !! هو في أي قضية احنا اتنازلنا عنها رغم الترغيب والترهيب اللي شفناه وناس كتير كانت شاهدة عليه علشان يقولوا بنتبتز الناس بالقضايا!! وهو في ناس هترفع قضية تحكيم دولي ويتحكم ليهم بـ17 مليار زي ما بيقولوا وهيسيبوا الـ17 مليار ويتمسكوا بالشركة اللي دافعين فيها حوالي 200 مليون". 
وقالت نجلة الفخراني "أقسم بالله العظيم اتعرض علينا فلوس قد الرقم اللي بيقولوا عليه ده مليون مرة للتنازل عن قضايا بابا رافعها ومن كام سنة مش من النهاردة وبابا كان بيسمع منهم وبيجاريهم وبيعلي معاهم كمان يشوف آخرهم ايه وبعدين لا عمرنا خدنا مليم ولا اتنازلنا عن أي قضية".