اول تصريح من سلمى صباحي بعد اتهامها بالنصب

 

اعتبرت الإعلامية سلمى صباحى، نجلة المرشح الرئاسى السابق حمدين صباحى، أنها تعرضت مع آخرين لعملية نصب من خلال شركة تسويق إعلانى اسمها «جلوبال آد مارت»، معتبرة فى الوقت نفسه أن البلاغ المقدم ضدها من لاعب كرة يتهما بأخذ مبالغ مالية منه «كيدى وكاذب». 

 

وقالت سلمى فى تدوينة على صفحتها على «الفيس بوك»: «أنا سلمى صباحى مصرية زى آلاف المصريين العاديين اللى حلموا بمرتب ثابت بدل ما همّ مش لاقيين شغل، وحلموا ببيت ملك بدل الإيجار اللى قاطم ضهرهم، وحلموا بمدرسة كويسة لعيالهم يتعلموا فيها بجد، وحلموا بعربية بدل بهدلة المواصلات، وحلموا حتى يشتروا معاش عشان يضمنوا دخل لولادهم بعد ما يسيبوهم، يعنى ببساطة حلموا بحياة أفضل لكن للأسف اتضحك علينا وفلوسنا راحت فى شركة «جلوبال آد مارت». 

 

وأضافت: «أنا عملت امبارح محضر عشان أثبت حقى وحق زوجى وأقاربنا، وأنتظر من القضاء أنه يرجعلى ويرجع لكل الناس حقوقها المنهوبة، وللأسف تم استغلال اسمى وفوجئت النهارده على بعض المواقع الإخبارية بإن فيه بلاغ متقدم ضدى من واحد بيقول إنى أخدت منه فلوس والحقيقة إنى ماعرفش الراجل ده ولا عمرى شفته، وسأتخذ كل الإجراءات القانونية ضده وضد بلاغه الكيدى الكاذب لرد اعتبارى، وأى كلام تانى غير الكلام ده هو كذب وافتراء خصوصاً إن فيه ناس بتحب تصطاد فى الميه العكرة ونفسها تشوه سمعتى بأى شكل، وربنا هو العالم وهو سندى وهو المنتقم».