سرقت وبعت وأنا معرفش دي فيلا السفير .. ماذا قال لص العمرانية (خاص)

حلصت جريدة "النهار" على نص تحقيقات النيابة العامة في قضية سرقة 3 فيوزات كابينة كهرباء تخص فيلا السفير البلجيكي في شاعر ترعة الزمر بحي العمرانية بالجيزة، المتهم فيها كهربائي والذي أدانته محكمة جنايات الجيزة  بالسجن 3 سنوات. 

س: ما تفصيلات إقرارك؟

ج: اللي حصل إني أنا أصلًا كنت شغال كهربائي سيلسيون من سنة 2016، بس الدنيا جت عليا جامد، والشغلانة بقت مش بتجيب أي فلوس، ومبقتش عارف أعيش، فمبقتش شغال الشغلانة دي، وبدأت أنزل الشارع ألم خردة وكنزات وحديد وأروح أبيعه. ويوم الثلاثاء 2026/5/12 كنت ماشي في الشارع ناحية شارع ترعة الزمر بالعمرانية، ولقيت صندوق كهرباء الباب بتاعه مفتوح، فالشيطان لعب في دماغي، وقلت أفتحه أفك منه أي فيوزات وأروح أبيعها خردة بأي مبلغ عشان أعرف آكل وأشرب. وفعلاً فتحت صندوق الكهربا ده، وفكيت منه 3 فيوزات ألومنيوم، وخدت بعضي ومشيت، وطلعت على مخزن خردة في شارع البطاريات، وده شارع جنب شارع ترعة الزمر، والمخزن ده بتاع واحد اسمه محمد سيد حلمي، وعرضت عليه الثلاث فيوزات اللي فككتهم من صندوق الكهرباء، وقلتله إني عاوز أبيعهم، قاللي: مفيش مشكلة، هشتريهم منك، واديهمله بمبلغ 80 جنيه ومشيت. ويوم الأربعاء 2026/5/13 حوالي الساعة 4 مساءً، لقيت الحكومة جاتلي وأنا كنت في الشارع بلم بلاستيك، لقيتهم بيقولولي: إنت سارق فيوزات كهرباء من صندوق كهرباء قدام بيت السفير البلجيكي في شارع ترعة الزمر. قولتلهم: حصل، بس والله ما كنت أعرف إن ده بيت السفير البلجيكي. سألوني: بعت الحاجة لمين؟ قولتلهم: بعتها لمخزن خردة، وصاحب المخزن ده اسمه محمد سيد حلمي. وراحوا المخزن وجابوا اللي اسمه محمد سيد حلمي، وأخدوا من المخزن عنده 3 حتت حديد ألومنيوم، ودي الفيوزات اللي أنا سرقتها. وبعد كده أخدونا على القسم، عملوا المحضر، وجينا النهارده على النيابة، وده كل اللي حصل.

س: متى وأين دارت تلك الأحداث؟

ج: أنا فكيت الفيوزات من صندوق الكهرباء اللي في 256 شارع ترعة الزمر يوم الثلاثاء 2026/5/12، الساعة 12 ظهرًا، وأنا اتمسكت يوم الأربعاء 2026/5/13 حوالي الساعة 4 عصرًا في شارع البطاريات في العمرانية الشرقية.

س: ومن كان برفقتك آنذاك؟

ج: كنت لوحدي.

س: ما هي تحديدًا طبيعة عملك؟

ج: أنا أصلًا كنت شغال كهربائي سيلسيون، بس الدنيا خبطت معايا والشغلانة مبقتش جايبة همها، فبقيت بلم خردة من الشارع وأروح أبيعها عشان آكل عيش.

س: صف لنا تفصيلات ارتكابك للواقعة محل التحقيق؟

ج: أنا زي ما قلت، أنا كنت ماشي في الشارع ولقيت صندوق الكهرباء اللي في شارع ترعة الزمر ده في وشي، والشيطان وزني أفك منه فيوزات ألومنيوم وأروح أبيعها، بس والله مكنتش أعرف إن ده بيت السفير البلجيكي.

س: وما وصف ذلك الصندوق الكهربائي محل ارتكابك الواقعة؟

ج: هو صندوق كهرباء لونه رمادي، وكان موجودًا على سور طويل في شارع ترعة الزمر.

س: ولِمَ وقع اختيارك على ذلك الصندوق الكهربائي تحديدًا لارتكاب الواقعة؟

ج: أنا كنت ماشي في شارع ترعة الزمر بالصدفة بلم خردة، وده اللي لقيته في وشي بالصدفة.

س: كان بحوزتك أية أسلحة أو أدوات حال اقترافك لتلك الواقعة؟

ج: لا، أنا مكنش معايا أي حاجة.

س: أمن المنطقي أن تقوم بفك تلك القطع الألومنيوم دون استخدام أية أدوات، ودون أن ينتج عن ذلك إصابتك بصعق كهربائي؟

ج: أيوة، لأن الفيوزات الألومنيوم دي بيبقى عليها عازل، فلما بتتمسك وتتفك مش بتكهرب.

س: وما هي طبيعة وعدد القطع الألومنيوم محل السرقة؟

ج: أنا فكيت 3 فيوزات ألومنيوم من صندوق الكهرباء.

س: ومِلك مَن تلك المسروقات؟

ج: أنا معرفش هي بتاعة مين، بس هي كانت في صندوق الكهرباء.

س: وبكم تقدر قيمتها؟

ج: أنا بيعتها بـ80 جنيه.

س: أنتج عن استيلائك على تلك المسروقات - المهمات الكهربائية - انقطاع التيار الكهربائي بمحل ارتكابك الواقعة؟

ج: الدنيا كانت نهار، ومعرفش الكهرباء قطعت ولا لا.

س: ما صلتك تحديدًا بالمضبوطات المعروضة عليك الآن؟

ج: هي القطع الألومنيوم دي شبه الفيوزات اللي أنا سرقتها، بس أنا مش فاكر هي هي نفس الفيوزات ولا لا.

س: وما وجه تصرفك في المسروقات آنفة البيان عقب استيلائك عليها؟

ج: أنا بعد ما فككتهم من صندوق الكهرباء، روحت لواحد لمحل خردة وصاحبه اسمه محمد سيد حلمي، وبعتهم لواحد من اللي شغالين فيه في المحل.

س: وما هي بيانات الشخص القائم بالتحصل منك على تلك المسروقات؟

ج: هو واحد من اللي شغالين في مخزن الخردة بتاع محمد حلمي سيد، بس معرفش اسمه إيه.

س: ولِمَ قصدت ذلك المتجر تحديدًا لتصريف المسروقات آنفة البيان؟

ج: عشان ده محل الخردة اللي كان قريب من شارع ترعة الزمر، وأنا على طول ببيع له خردة.

س: وما تحديدًا طبيعة العلاقة فيما بينك وبين المتهم محمد حلمي سيد؟

ج: هو مش صاحبي، بس أنا أعرف إنه صاحب محل خردة في شارع البطاريات.

س: وما مدى علم المتهم محمد حلمي سيد بكون تلك المسروقات متحصلة من جناية سرقة؟

ج: هو مكنش يعرف.

س: وما هي قيمة المبلغ المالي المتحصل عليه نظير تصريفك لتلك المسروقات؟

ج: أنا بعتها له بـ80 جنيه.

س: ومن الشخص القائم بتسليمك ذلك المبلغ المالي؟

ج: حد من اللي شغالين في مخزن الخردة بتاع محمد حلمي سيد.

س: صف لنا تحديدًا ظروف ضبطك وعرضك علينا؟

ج: يوم الأربعاء 2026/5/13 حوالي الساعة 4 مساءً، لقيت الحكومة جاتلي وأنا كنت في الشارع بلم بلاستيك، لقيتهم بيقولولي: إنت سارق فيوزات كهرباء من صندوق كهرباء قدام بيت السفير البلجيكي في شارع ترعة الزمر. قولتلهم: حصل، بس والله ما كنت أعرف إن ده بيت السفير البلجيكي. سألوني: بعت الحاجة لمين؟ قولتلهم: بعتها لمخزن خردة، وصاحب المخزن ده اسمه محمد سيد حلمي. وراحوا المخزن وجابوا اللي اسمه محمد سيد حلمي، وأخدوا من المخزن عنده 3 حتت حديد ألومنيوم، ودي الفيوزات اللي أنا سرقتها. وبعد كده أخدونا على القسم، عملوا المحضر، وجينا النهارده على النيابة.

س: ومن القائم بضبطك تحديدًا؟

ج: أنا اللي مسكني 2 من المباحث.

س: وما سبب قيامهم بذلك؟

ج: علشان الفيوزات اللي أخدتها من صندوق الكهرباء.

س: وهل من ثمة تفتيش انصرف لشخصك؟

ج: أيوة.

س: وما الذي أسفر عنه ذلك التفتيش؟

ج: ملقاش معايا أي حاجة.

س: وهل من ثمة خلاف أو علاقة بينك وبين الرائد مصطفى عاطف، معاون مباحث قسم شرطة العمرانية؟

ج: لا خالص، مفيش خلاف.