حوار بينى وبين هالة وشاورت ليسرا تخلص.. إلهام شاهين توضح حقيقية الصور المتداولة بندوة لبلبة في مهرجان الجونة

خرجت الفنانة" إلهام شاهين" في تصريح توضح من خلاله حقيقة الصور المتداولة لها وهي تضحك وتتحدث مع هالة صدقي، خلال كلمة لبلبة في ندوة تكريم يسرا بمهرجان الجونة السينمائي.

قالت "شاهين" خلال مداخلة صوتية مع إحدى البرامج التلفزيونية أن الحوار كان بيني أنا وهالة، مش المفروض أقول كنا بنقول إيه، بس الحقيقة أني كنت بقولها هموت عايزة أروح التواليت، فقالتلي الحمام بعيد وخلاص قربنا نخلص الندوة، وهزرت وقالتلي اعمليها مكانك وخلاص فضحكنا".

تابعت الفنانة قائلة : "شاورت ليسرا وقولتلها يلا خلصوا الندوة عايزة أروح الحمام.. هو هزار بين 2 صحاب، ونونيا (لبلبة) ملهاش دخل بيها تمامًا، نونيا حبيبتي وصحبتي وعشرة عمر، وهي عارفة هي إيه بالنسبة لي، صديقة غالية جدًا" .

أضافت الفنانة إلهام شاهين: "حاجة غريبة جدًا ليه متصورين كده؟ عشان بيتنمروا علينا طول الوقت فمتخيلين أننا بنتنمر على بعض، بالعكس أنا على طول بأكد أننا الفنانين متماسكين جدًا وصحاب اوي ومفيش حاجة هتوقع بينا، ده كلام سخيف وعبيط".

وأختتمت شاهين "مش ممكن.. ع طول بيتصيدوا لينا الأخطاء، ماشيين على مبدأ حبيبك يبلع لك الزلط وعدوك يتمنالك الغلط، وواضح أننا أعدائهم، معرفش ليه عايزين يخلقولنا الغلط".