بشأن إغلاق بيوت الثقافة.. صبري فواز يقترح حلولًا للأزمة: نفتحها نشغل المتطوعين.. واشمعنى دي اللي محرومة من الإعلانات؟

علق الفنان صبرى فواز، على أزمة غلق بعض البيوت وقصور الثقافة على مستوى الجمهورية، واصفًا قصور الثقافة بالجدار الأخير في الحرب ضد الظلام، مقترحًا عدد من الحلول لحل تلك الأزمة.

وقال صبري فواز، في مقطع فيديو عبر حسابه بموقع فيسبوك: في الموضوع اللي حاصل دلوقتي وعامل لغط كبير بيوت قصور الثقافة والمكتبات، الموضوع مهم وخطير عشان بيوت الثقافة هي الجدار الأخير في حربك ضد أي ضلمة، الثقافة الجماهيرية مهمة لدرجة نجوم كتير في كل مجالات الثقافة والفنون ومنهم نجوم كبار في التاريخ كله، ودي المنفذ اللي الناس تتنفس فيه على أي مكان على مساحة جمهورية مصر كلها فن وثقافة.

وتابع: في عندنا 563 بيت وقصر ومكتبة على مساحة الجمهورية، اللي شغال منهم بالفعل 220، وعطلان 343، ودول عطلانين لأسباب مختلفة في منهم اللي مقفول بحجة الصيانة زي الفيوم، وفي اللي معطل بلا أسباب زي المنصورة وكفر الشيخ، والـ 343 دول في منهم 123 موقع الوزارة عايزة تقفلهم، وسيادة الوزير قال أن دي أماكن ضيقة ومؤجرة وبعضها مُهدم وبعضها مبيشتغلش بقاله شهور، ودي أسباب لقرار الإغلاق.

وواصل: الحقيقة سمعت من ناس كتير متخصصين وسمعت من سيادة الوزير، وأنا عندي تجربة طويلة جدًا في الثقافة الجماهيرية وأنا من أبناء الثقافة الجماهيرية قبل ما أدخل أكاديمية الفنون، وأعرف أن في أماكن بتطلع نور وفي موظفين مش عايزين يشتغلوا، الوزارة خدت قرار بـ إغلاق 123 موقع لأسباب مالية وأسباب أن بعضها مؤجر.

واستكمل: أصلًا إحنا محتاجين نضاعف الـ 563 ولكن المشكلة في الميزانية، طب ما تيجي نفتح الباب للناس في عروض الثقافة الجماهيرية للتعاقد مع الإعلانات زي بقية الأنشطة في الدولة، ليه دول محرومين؟، وأي مُعلن هيبقى عنده رغبة يتعامل مع 563 موزعين على مستوى الجمهورية كلها، وفي بعض الأماكن فيه شباب عايزة تشتغل افتحوا ليهم المجال.

وأضاف صبري فواز، في اقتراح حلوله لحل أزمة غلق قصور الثقافة: وفي ناس بتقوم بعمل بيت ثقافة متنقل، بني آدمين حابين الموضوع ومخلصين جدًا وأعرف منهم ناس بيقوموا بمقام المؤسسة، افتحوا ليهم البيوت اللي مش شغالة خليهم يشغلوها وخلي الموظفين في خدمة المنتج، طالما دول قدروا ينجحوا ويوصلوا للعيال الصغيرة وبيعملوا معاهم حاجات في منتهى الروعة وكل ده محبة، افتحوا ليهم البيوت والقصور خلوهم يشغلوها.

واستطرد: إحنا محتاجين قد البيوت والقصور اللي موجودة 10 مرات على الأقل علشان تكفي كل الناس إحنا 110 مليون، سيبوا الناس تشتغل بالطريقة دي ومش هيبقى في حمل على الدولة في الفلوس، لأن الناس دي متبرعة افتحوا بس ليهم البيوت وقصور الثقافة والموظفين يسهلوا ليهم المهمة بتاعتهم وهيشتغلوا من غير ما يكلفوا الدولة حاجة.

واختتم صبري فواز: كل الدولة دخل فيها إعلانات اشمعنى الثقافة الجماهيرية لأ؟، لو في لائحة نعدلها، مش هنسيب الأماكن مقفولة وبعدين تبقى حمل علينا ونقول عايزين نقفلها خالص، لأ إحنا محتاجين قدها 10 مرات.