أول تعليق من حسام حبيب على شائعة خطوبته: ابعدوا عن حياتي

تصدر اسم الفنان حسام حبيب، مواقع التواصل الاجتماعي المختلفة خلال الساعات الماضية، بعد إعلانه اتخاذ الإجراءات القانونية ضد مروجي شائعة خطوبته، وارتباطه بشكل رسمي من عارضة أزياء أردنية تدعى سارة.

وقال حسام حبيب، في تصريحات تلفزيونية لـ ET بالعربي: الموضوع ما وصلش خالص للخطوبة نهائي، هما سبقوا الأحداث وخلّوا الموضوع يتعقّد بدل ما يحصل فيه خير. يعني اللي حصل ده، مش عارف أقولهم إيه بصراحة، وأصلاً الحاجة اللي بيتكلموا عنها عمرها ما وصلت لربع اللي بيتقال، ومش عارف الناس عايزين إيه مني بجد، على طول الناس بتخربلي حياتي إن كان في حاجة، هما كده بوظوهأ.

وتابع: لأن أهل البنت ليهم عاداتهم وتقاليدهم، وناس محترمين جدًا جدًا زيّ ما إحنا زمان كان لينا عاداتنا وتقاليدنا، وكنا بنحترم يعني إيه بنت، مش عارف إيه اللي حصل للمصريين؟ النخوة اللي كانت عندنا راحت فين.

وأضاف: ابعدوا عن حياتي بقى، أنا مش عارف إيه ده! إمتى هتسيبوا الناس في حالها؟ عمرنا ما اتكلمنا عن مين خَطَب ومين اتجوز، ولو حصل، بيتكلموا بعد الأحداث. دلوقتي بيتكلموا عن بنت وليها عائلة كبيرة، وبقى كل همنا التريند والفيديو ده يجيب كام؟ مش عايز حد يتكلم عني، ولا الناس كلها تتكلم عني.

وأوضح حسام حبيب قائلا: أنا طلعت مع بسمة وهبة وقلت إن الجمهور بقى آخر همي، عشان أوصل رسالة إني مش عايز تريند، هو في فنان بيقول كده؟ هما وصلوني لكده، وكل شوية يطلعوا يقولوا إن حسام حبيب صرح، أنا صرّحت فين؟ أنا ما قلتش حاجة لحد نهائي! وبعدين بيقولوا إن علاقتي بالبنت دي من سنين! هي أصلاً البنت عندها كام سنة عشان يتقال كده.

واختتم: أنا هشوف مين اللي كتب الكلام ده على لساني وهحبسه، لأني ما قلتش لأي حد، وأنا هكبر المشكلة، لأن البنت دي بنت ناس كبيرة أوي في الأردن، فهندخل القضايا ونشوف بقى!.