عضو مجلس إدارة الأهلي: الخطيب تحمل الضغوطات في صمت رهيب

أزاح محمد الغزاوي عضو مجلس إدارة النادي الأهلي الستار على كواليس حسم صفقة انضمام أشرف بن شرقي إلى صفوف الفريق الأول خلال فترة الانتقالات الشتوية الماضية.

وقال محمد الغزاوي في تصريحات تليفزيونية: محمود الخطيب بيحب يبقا ايده في كل حاجة وميسيبش أي حاجة وفي الأول وفي الآخر همه كله مصلحة النادي وأعضاء النادي.

وأضاف: نتمنى للخطيب العودة إلى ناديه بالسلامة والشفاء العاجل، وهو محتاج فترة راحة يرجع منها أحسن من الأول بكتير إن شاء الله ومن معرفتي به فـ معتقدش أنه هيقدر يبعد حتى لو محتاج دا؛ لأن شغله الشاغل هو النادي الأهلي.

وأشار محمد الغزاوي خلال تصريحاته: الخطيب اشتغل في صفقة بن شرقي في صمت رهيب رغم الضغوطات التي تحملها بنفسه، والجمهور من حرصه وحبه كان كلهم قلقانين والخطيب استحمل الضغط دا في صمت.

وأكد: سعادتنا كانت لا توصف بالصفقات، وكلها كانت من العيار الثقيل واحنا عندنا احسن لاعيبة في مصر، بجانب الصفقات الجديدة.

وأتم محمد الغزاوي تصريحاته: الحلم بقا حقيقة وأخيرًا بقا عندنا استاد الأهلي، وبقول للجمهور افرحوا بالاستاد وإن شاء الله أول مباراة نكون كلنا في الاستاد بنفرح بالحلم.