عدلي القيعي يفتح النار على أكرم توفيق ووكيله.. ويحذر من رد الأهلي

أزاح عدلي القيعي، رئيس شركة الكرة السابق بالنادي الأهلي، الستار فاتحًا النار على أكرم توفيق، لاعب الفريق الكروي الأول بالقلعة الحمراء، بسبب تأخره في تجديد تعاقده.

وقال القيعي في تصريحات خلال برنامج «ملك وكتابة» الذي يقدمه على قناة الأهلي: «دلوقتي في متغير جديد، لما لاعب عقده يخلص وعايز تجددله بيجيبلك وكيله أو حد من قرايبه يقعد معاك ويقولك نسيب الموضوع لوقته ونتكلم لما العقد يخلص، إلا الناس اللي بتحسم أمورها مع نفسها ولديهم قرار بالاستمرار في الفريق».

وأضاف: «اللاعب اللي يسيبك لآخر 6 أشهر ده أعرف إن في دماغه حاجة، وحط في المشهد إن أكرم أخو أحمد توفيق، وأحمد بياخد مبالغ هايلة جدا، رغم إن أداء أكرم أفضل وأكثر تأثيرا».

وزاد: «أكرم توفيق بيقولك أنا أخويا عمال بيشتري في أراضي وبيبني بيوت، بس مبتتحسبش كده لازم أبص وأشوف أنا بعمل تاريخ ولا لا، وبعمل علاقات هتفيدني في مستقبلي ولا لا».

وتابع: «إذا كانت الإجابات عن الأسئلة السابقة دي بتريحك فهتكمل، أما إذا كانت الضغوط قوية عليك سواء من أسرتك أو من وكيلك لأن الوكيل لا يهمه النادي ولن يخلص للنادي لأن مصلحته ستكون من بيع اللاعب».

وأضاف: «خلاص يا أكرم أنت لو قولت بوضوح موقفك ايه مكناش وصلنا لكده، مش محتاج بقا تضغط وتروح تلاغي الجماهير، وتبين إن الأهلي قصر وإنه عمل معاك إيه في قطر، عشان الأهلي ميردش وندخل في موضوعات أخرى».

وأتم: «عايز تفكر في مصلحتك يا أكرم كنت قول من بدري عشان ألحق أرتب أوراقي، هذا هو لومي، وهذا كان أساس المشكلة مع عبدالله السعيد إنه مكنش مفهم الناس كلها إنه مخلص مع الزمالك».