”بتوع الراب معدينك ”.. ويجز يهاجم رامي صبري بعد حديثه عن أغاني الراب (تفاصيل)

شهدت الساعات الماضية حالة من التوتر بين المطرب رامي صبري و مطرب الراب ويجز، بسبب التصريحات الأخيرة لـ صبري بأنه لا يفهم كلمات أغاني مطربي الراب وعلى رأسهم ويجز.

وهاجم ويجز، عبر خاصية الإستوري، على موقع تبادل الصور والفيديوهات الشهير إنستجرام رامي صبري قائلًا: هتكلم على فنان فاكر أن عنده صلاحيات أنه يتكلم علي أي حد ومفكر الناس المفروض تسمع وتسكت.

وأضاف: الفنان دا اسمه رامي، كل 5 أو 6 شهور لما يزهق يطلع على التليفزيون يتكلم على بتوع الراب، طيب هتتكلم أمتى على البوب اللي أنت منهم؟ هتتكلم على فنك ومجالك أمتى؟، أنا شايف أنك مابتفهمش في الراب حاجة ولا بتفهم الكلام بتاعه زي ما أنت قولت قبل كدا فمش هتعرف تعمله.

واختتم :أنا مثلا لو لقيت واحد بيعرف يسوق عجلة وأنا مبعرفش بحترمه عشان هو عمل حاجة غير اللى أنا عملتها، هو أكيد اشتغل على نفسه في حاجة أنا ماشتغلتش على نفسي فيها، أنت مابتقدرش الفنانين أنت شايفهم بيحاولوا يوصلوا للمستوى اللي أنت فيه مع إنهم معدينك بكتير أنت مش رقم 2 يا رامي أنت رقم 19 مثلًا، أنت بعيد أوي يعني.

الجدير بالذكر أن رامي صبري قد تحدث خلال لقائه في برنامج "حبر سري" عن المهرجانات والراب قائلًا: المهرجان مش بيتغنى حلو والناس بتحبه وأنا ساعات بسمعه، لكن مش هو اللون اللي ممكن أغنيه.

وأكد احترامه لموسيقى الراب، مشيرًا إلى أنه يوافق على التعاون مع نجوم مثل مروان بابلو وويجز في عمل غنائي ثنائي، موضحًا: "ويجز شاطر ومجتهد وفرض نجاحه، وأغانيه معروفة، وأنا لسه عند كلامي أني مبفهمش كلمات أغانيه، في أغاني بتاعته لغاية دلوقتي مبفهمش كلماتها"، مضيفًا: «أنا مكنتش بفهم كلامه فعلاً، لكن ويجز موهوب جدًا، وأنا لست ضد نجاحه، أي شخص ضد النجاح فهو مريض نفسي».