«بسبب نجم الزمالك».. شوبير يكشف لأول مرة كواليس سحب شارة كابتن منتخب مصر منه

كشف الإعلامي أحمد شوبير حارس مرمى الأهلي ومنتخب مصر السابق لأول مرة كواليس سحب شارة كابتن منتخب مصر منه في حقبة الراحل الجنرال محمود الجوهري.

وقال أحمد شوبير في تصريحات إذاعية اليوم الثلاثاء: «النهاردة هحكي لكم قصتي مع شارة الكابتن في منتخب مصر واللي فضلت سنين كثيرة مش عايز أحكيها خاصة إن الناس اللي حاضرين القصة موجودين فانا هحكيها وهقولها للناس كلها».

وتابع شوبير: «أيام كابتن الجوهري جاء الدور عليّ في ارتداء شارة قائد منتخب مصر بالأقدمية، وفضلت ييجي سنة كابتن تقريبا في تصفيات كأس العالم 1994، ثم فؤجئت بأبي الروحي الكابتن محمود الجوهري بيقول لي أحمد إحنا بصينا كده في ترتيب الكبتنة ولقينا هشام يكن أقدم منك فأنا ضحكت، لإن هشام كان لعب دقيقة في مباراة زيمبابوي كده يعني فاعتبروها أقدمية له».

وأوضح شوبير: «أنا كنت لعبت قبل منه مباراة ودية دولية أمام النرويج، وقولت له يا كابتن جوهري ده حقي وأنا القائد بالأقدمية فلقيت إصرار من كابتن الجوهري على الموقف بتاعه وقال لي عايزك تركز وسيبك من موضوع الكابتن ده».

وأضاف شوبير: «الجوهري قال لي فكر، فقلت له مش هفكر اللي أنت عايزه يا كابتن، فلقيته بيقول لي إيه ده أنا افتكرتك هتعترض وتعمل مشكلة، قلت يا كابتن جورهي الكبتنة مش بشارة تتحط على الذراع، وما علمته بعد ذلك هو إن الكابتن الجوهري كان بيحب حسام حسن قوي وكان عايز يفضي السكة لحسام يعني كان هشام يكن خلاص قرب يبقى بره المنتخب وبعد ما أنا وافقت عشان أركز كان طبيعي هيخلي حسام الكابتن».

واختتم شوبير: «وبعدها قلت يا كابتن جوهري بص اللي أنت عايزه بس لو كابتن هشام يكن مش موجود هكون أنا الكابتن، وعموما كابتن يكن ما قعدش كثير كابتن واعتزل وبعدها مشي الجوهري وبقيت أنا الكابتن».

وأردف شوبير: «أنا رأيي عموما إن شارة الكابتن تكون بالاختيار مش بالأقدمية وكنت مؤيد لقرار حسام البدري إن محمد صلاح يكون الكابتن وده حصل في البرتغال مع كريستيانو رونالدو وفي الأرجنتين مع ميسي، وميسي لم يصبح أكثر خطورة وتركيز مع الأرجنتين إلا بعدما أصبح الكابتن».