«لعيبة الأهلي رجالة».. رسالة نارية من إبراهيم سعيد لـ الغندور بسبب تصريحاته

وجه الإعلامي إبراهيم سعيد، انتقادًا حادًا لـ خالد الغندور نجم الزمالك السابق، بعد تصريحات الأخير بأن فريق سيراميكا كليوباترا أقوى من العين الإماراتي الذي فاز عليه الأهلي في كأس القارات.

وقال إبراهيم سعيد في تصريحات تليفزيونية عبر شاشة «النهار»: «اية اللي جاب سيراميكا كليوباترا للعين، شوف أسماء اللعيبة في العين اللي بيقولوا عليه الزعيم بمعنى بطل وشوف الأسماء في سيراميكا مع احترامي للفريق اللي بيقدم مستويات رائعة».

وأضاف: «خالد الغندور عايز يوصل للجمهور أن فريق العين ضعيف، وأنا بقولكم لا طبعًا فرقة محترمة جدًا، بس هما خاف من جمهور الأهلي المرعب في استاد القاهرة الرعب واتخضوا، ولكن بشكل عام هي فرقة قوية جدًا، وعندهم سفيان رحيمي مرشح أنه يبقى أحسن لاعب في إفريقيا السنة دي».

وأكمل: «أنا لعبت قدام أسماء كبيرة مع المنتخب والأهلي كانو بيخافوا من الجمهور في استاد القاهرة، زي الحاج ضيوف ودروجبا وغيرهم كتير، عشان كدة أطلقوا عليه استاد الرعب».

وأردف: «النادي الأهلي كسب بمجهوده ولعب على أعلى مستوى، أنا مالي إن الفريق التاني خاف ماهي الكورة كدة، اللي بيخاف بيخسر، الأهلي بطل الأفروآسيوي وأول فريق مصري وعربي وأفريقي يحصل على البطولة دي».

وزاد إبراهيم سعيد: «أنتو ليه بتحاولو تقللو من البطولات، والأندية اللي بتلعب قصاد النادي الأهلي، أندية الهلال والاتحاد والعين والدحيل وخسروا أمام الأهلي، ولو لعبنا أي بطل هنكسب، والفرق بينا وبينهم أن لعيبة الأهلي رجالة وكانت نازلة الماتش مركزه».