مجدي عبد الغني: اتحاد الكرة في 2019 كان لابد من حلّه وفيه لبس للمنتخب بـ 15 مليون جنيه منعرفش عنه حاجة

أزاح مجدي عبد الغني الستار فاتحًا النار على اتحاد الكرة الذي كان متواجدًا لإدارة الكرة المصرية في 2019 برئاسة هاني أبو ريدة.

وقال مجدي عبد الغني في تصريحات تليفزيونية: إني أبقى رئيس بعثة المنتخب ملهاش فايدة إنما مسؤولية كبيرة وحلوة معنويا، وأنا اكتر واحد اعتذرت عن السفر.

وأضاف: اتحاد الكرة في 2019 كان أسوأ اتحاد وكان لابد أن يتم حله.. ومعنديش مشكلة مع أبو ريدة ومجاهد وبحبهم لكن في الشغل مش بحبهم.

وتابع مجدي عبد الغني تصريحاته: فيه لبس للمنتخب المصري بـ 15 مليون جنيه و“اتفرتك” واحنا مكناش نعرف عنه حاجة.

وأكد: المنتخب أخد 15 مليون جنيه نظير لبس ومنعرفش عنه حاجة ودا كان تعاقد مع شركة معينة، ودخلت المخازن وخدت الشنطة بتاعتي قبل السفر لكأس العالم، واتقال إن أنا سرقت اللبس ومحدش يقدر يواجهني مباشر لأن اللي يواجهني مباشر هحط صباعي في عينه وزعلت وهما كانوا في منتهى البرود.

وأشار مجدي عبد الغني في تصريحاته: ثروت سويلم قالي إن هاني أبو ريدة كان مصمم إني أرجع شنطة اللبس اللي خدتها واحنا كنا في رمضان فـ قولتله استنى بعد الفطار، وجيت أرجعها مرضيوش لأنهم قالولي لا هاتوها دلوقتي حالا.

واستمر في تصريحاته: لقيت لبس المنتخب في ولد لابسه في الشارع وبيقولي اشتريته مع إن المخازن كانت فاضية.

وأردف مجدي عبد الغني في تصريحاته: لا علاقة لي بـ خافير أجيري ولا أعرفه قبل المنتخب.. وهاني أبو ريدة هو من تعاقد معه فكيف أحصل أنا على عمولة؟

وتعجب: اتقال إني واخد 6 جزم كورة، وأنا مبلعبش كورة أصلا من ساعة ما اعتزلت، دا أي كلام ولحد دلوقتي زعلان من هاني أبو ريدة.

وأتم مجدي عبد الغني تصريحاته قائلًا:أنا نجم النادي الأهلي وهفضل نجم النادي الاهلي والأهلي ليه فضل عليا ولما رجعت من البرتغال اتعرض عليا نادي الزمالك واعتبرت إنها خيانة بس مطلعتش كدة في الاخر، لأن في ناس راحت الزمالك وموجودة حاليا داخل الأهلي، ولكن الأهلي مش بتاع حد.. النادي بتاعنا كلنا، ولا أبحث عن دور في الأهلي بهذا العمر.