وكيل القندوسي: اللاعب كان ممكن يفتعل مشكلة لما كولر رفض عودته.. لكنه لم يفعل هذا

أزاح نصر يحيى وكيل اللاعب أحمد القندوسي الستار على كواليس ما حدث في التحقيقات مع النادي الأهلي والمدير الرياضي محمد رمضان، والشؤون القانونية بعد أزمة تصريحاته.

وقال نصر يحيى في تصريحات تليفزيونية: نتيجة التحقيقات مش مفاجأة وقدمنا ما يثبت كلام أحمد القندوسي وقرار لجنة التحقيق كان منصف ولم يكن مفاجأة وراهنت على الأهلي لأني أتعامل مع نادي كبير، ولو لقى مشكلة مش هيسكت.

وأضاف: قرار عرض أحمد القندوسي للبيع وإعادة هيكلة لجنة التعاقدات قرار مش مفاجئ لأننا قدمنا ما يثبت صحة كلام قندوسي وراهنا على الأهلي وكسبنا.

وأشار نصر يحيى خلال تصريحاته: تصريحات القندوسي مكنش مترتب ليها واللاعب دخل اتكلم ولما اتسأل اي المشكلة اللي عطلت صفقة بلعيد فـ أجاب بتلقائية ووضح إي اللي حصل في مكالمته مع زين الدين بلعيد.

وأوضح: القندوسي مقالش لـ زين متجيش الأهلي ودي من ضمن الحاجات اللي برأنا نفسنا فيها والشؤون القانونية في الأهلي ومحمد رمضان كانوا بيتعاملوا بالشفافية وبمنتهى النزاهة.

وشدّد نصر يحيى في تصريحاته: بلعيد صرح بأن القندوسي كان يقنعه بالانضمام إلى الأهلي.

وأتم تصريحاته قائلًا: خرجنا 6 شهور إعارة عشان كنا مقتنعين إننا لسة عايزين وقت عشان نقنع كولر، ولما جينا نرجع السيزون دا كانت لسة نفس المشكلة إن كولر محتاج حد فنيًا مش طريقة لعب أحمد وكان ممكن هنا يفتعل مشكلة ويقول مش هطلع تاني لكن القندوسي من أول اللاعيبة في مصر اللي اتحدد مصيرها في فترة الانتقالات ومكنش مانع يكمل في سيراميكا وفي عروض اترفضت لأنها كانت بيع نهائي وكان متقبل الإعارة عشان فكرة إننا راجعين تاني.