بسمة وهبة: أي حد هيغلط في الدين هقل أدبي عليه.. وعيب اللي بيتقال على الصوفية

ردت الإعلامية بسمة وهبة على انتقادات الجمهور بشأن فيديو حلقة الذكر الذي نشرته مؤخرًا، عبر صفحتها الرسمية بـ انستجرام، بجانب حديثها عن علاقتها بالشيخ جابر البغدادي.

وقالت بسمة وهبة، خلال فيديو عبر انستجرام: مش بحب أدافع عن نفسي بس لما يكون الموضوع متعلق بالدين لازم أطلع أدافع، لما نزلت فيديو قلت فيه عايزة حق الشيخ جابر البغدادي كنت متخيلة إن الناس هتتعاطف بس اكتشفت عكس كده.

وتابعت: في ناس بتشوه صورة الصوفية وإنها تبع العصر الجاهلي وإن فيهم ناس وحشة، وأنا عاوزه أقولهم عيب اللي بيتقال عن الصوفية، ده طريق تسمو فيه روحك مع ذكر الله والتوسل إلى الله ورسوله، وإحنا بنحب أي حاجه ربنا بيحبهم لأن ربنا بيعزهم وبيحبهم.

وأضافت: كنت عايشة على حبوب المهدئات والاكتئاب في فترة في حياتي ولما عيشت مع الصوفية بدأت روحي تتجلي، بذكر الله ورسوله وإحنا بننشد لسيدنا النبي بعد ما الناس غنت ليه طلع البدر علينا، وده بيخلي روحك معلقة في السماء، والصوفية طريق حلو وجميل ومش هتخسر فيه هتكسب فقط مليان ناس كلها خير ومحبة وبنتقابل في الله وحبه.

وبشأن انتقادات الجمهور على نشرها فيديو لحلقة ذكر في منزلها، ردت: فيديو صاحبتي اللي عملته كانت مصابة بالسرطان وانتشر في جسمها وكنا عاملين حلقة ذكر عشان نقويها، وكنت بستعين بالله، والسوشيال ميديا كتبوا عناوين غلط إني بقول بحق الشيخ جابر يشفى صاحبتي، وربنا لا يسامحكم لأنهم خدوا الكلام غلط ومنكم لله وأنا ما استعنتش بـ بني آدم أن يشفى صديقتي ومنكم لله عشان أنا كنت بقول حق الشيخ جابر وربنا يشفيها.

وعن علاقتها بالشيخ جابر البغدادي، أوضحت وهبة: لمع كالنجم في السماء رجل محترم وشريف ومحب ومعطاء وكل الصفات الحلوة فيه، وأنا بتعلم منه وتلميذة من تلميذاته وهو بيعلمك ازاي تلجأ إلى الله وأهل بيته.

واختتمت: مقولتش بحق الشيخ جابر خالص، فرقوا في المواضيع ومحدش يغلط في الشيوخ سواء صوفية أو غيره أو الأزهر وأنا هفديه بروحي وأي حد هيغلط في الدين أنا هبقى قليلة الأدب وهقل أدبي عليه وهمرمط بيه الأرض ودي إساءة بالغة.