بعد خلافه مع تامر عاشور.. حسام حبيب يعتذر: كان هزار تقيل وحقك عليا يا نجم

وجه الفنان حسام حبيب، رسالة اعتذار للفنان تامر عاشور، وذلك بعد أزمته وخلافه مع الأخير خلال الفترة الماضية.

وكتب حسام حبيب، عبر خاصية استوري على صفحته الرسمية بموقع التواصل الاجتماعي انستجرام قائلا: على فكرة يا جماعة أنا بهزر، هو فنان محترم وليه جمهور كبير وبيقدم فن راقي وأنا بعتذر له لو كان الهزار تقل، أنا بس كنت بنكشه لأنه تقلها عليا شويتين.

وتابع حبيب: هو زميل ومحترم وبيقدم فن محترم، أنا بحب اللي هو بيقدمه وهو اجتهد ولكل مجتهد نصيب، معلش حقك علي يا نجم.

أزمة تامر عاشور وحسام حبيب

وكانت أزمة الفنان تامر عاشور، وحسام حبيب، بدأت وقت أزمة حسام حبيب مع طليقته الفنانة شيرين عبد الوهاب، إذ علق تامر عاشور على الأزمة، عبر حسابه الشخصي بموقع X تويتر سابقًا: كل اللي أقدر أقوله في موضوع شيرين عبد الوهاب، أن مفيش كلمة واحدة بس من اللي اتقالت وانتشرت صح، أنا قريب من أهل شيرين ووالدتها وأخوها، أنا برضه أقولها أني بحبها وكل الدنيا بتحبها وتحب فنها، أهل شيرين مظهروش في حياتها آخر سنتين تلاتة أهل شيرين هم أهل شيرين من زمان كل نجاحات شيرين كانت وسط أهلها وناسها اللي يشيلوها من على الأرض شيل.

وتابع عاشور: يا رب يبعد عنها كل خبيث وأناني وفاشل وممثل، هي أطيب منهم كلهم وهم اللي وقعوها فكل مشاكلها، أنت بمن حولك، لو اللي حواليك فشله غصب عنك لازم تبقى زيهم وتعافر علشان تقدر تمارس اللي كنت بتعمله في عدم وجودهم بمنتهى السهولة، أنا كلت عيش وملح في بيتها وفي بيت أمها وأخوها وكان لازم أقول الكلام ده علشان الكلام ده هو الكلام الحقيقي ولا كلمة من اللي اتقالت واتسمعت ليها أساس من الصحة، أهل شيرين هم هم أهل شيرين من زمان أوي، بالعقل.