علي الطيب يعتذر لصناع مسلسل ”عمر أفندي” بعد اتهامهم بسرقته

اعتذر الفنان علي الطيب لصناع مسلسل "عمر أفندي"، عما صدر منه خلال الساعات الماضية، حول انتقاده لصناع العمل.

وكتب علي الطيب عبر حسابه في موقع التواصل الاجتماعي فيسبوك: "تم حذف البوست و الأسباب هي أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في اي برنامج او اي لقاء انهم اقتبسوها من وديع البساطي في مسلسل أهو ده اللي صار".

وأضاف:"مصطلح موجود في مصر زمان فعلا مش انا اللي اخترعتها. بس بيبقى كل ممثل بيبذل مجهود من أجل الشخصية تبقى لحم و دم مش كلام على ورق فقط و بيقول كلامه و خلاص. و ده كان جزء من مجهودي اللي تم أثناء تحضير الشخصية في المسلسل و بعد ما عرضت بعض المصطلحات على الأستاذ السيناريست عبدالرحيم كمال و الأستاذ حاتم علي عليه رحمة الله اخترنا اللي يتناسب مع الشخصية التي تعبر عن شخصيته و اتوظف في الحوار بشكل مناسب و منطقي للمشاهد من الأستاذ عبدالرحيم و اتعرض المسلسل و ربنا كتب لنا القبول في قلوبكم و نجح المسلسل و اتشهرت شخصية وديع البساطي بمصطلحاتها اللي تعتبر كانت جديدة على الجمهور رغم أن الجملة ليها أصل و معنى و وضحناه في المسلسل".

واستكمل:" و أظن احنا في مهنة واحده يعني عارفين شغل بعض و نعرف بعض كويس و بينا كل خير لا يمكن يجيلي عمل فني او اسكريبت و اكتشف أن في جملة أو مصطلح مشهور لزميل ليه و نجح بيه و اكرره أو اتجاهل مجهوده هو و صناع العمل واحترم نجاحه و حق كل فنان يغير و يبقى نفسه يعمل شخصية حلوة و يستمتع بأدائها المشاهد و ده حق شرعي بس أظن ان التميز هنا هيكون في الاختلاف و الاجتهاد المطلوب منك و ليس الاستسهال، و لنفرض حصل و قولت مصطلح يخص شخصية فنيه لعبها زميل و متفرجتش عليه أو مافيش حد نبهني، يبقى أقل واجب بعد عرض المسلسل و عرفت المعلومة يبقى أقل حق سواء كتاب العمل أو أنا كفنان أوضح في أي لقاء في اي برنامج أنه تم الاقتباس من العمل الفني اللي قبلنا".

واستطرد:" وقتها مش هيكون ليه حق ازعل و أفهمها تجاهل من زمايلي لأني غصب عني مفهمتهاش غير كده، و اللي يعرفني كويس عارف إني دايما مبتأخرش عن زمايلي و بفرح لنجاحهم من قلبي و لا عمري نفسنت ولا اتكلمت في تفاصيل شبه دي بس الموضوع لو مكنش يخصني كنت هقول كلمة حق في حق الزميل اللي سبق و نجح بشخصية و بمصطلحاتها اللي علمت مع الجمهور بفضل ربنا".