محمد سامي يستعيد ذكرياته مع تامر حسني بهذه الصورة

شارك المخرج محمد سامي متابعي صفحته الرسمية في موقع التواصل الاجتماعي إنستجرام صورة جمعته بالفنان تامر حسني قبل سنوات.

واستعاد محمد سامي ذكريات دعم تامر حسني له في بداية مسيرته في الدراما التليفزيونية قائلا: "وَلَا تَنْسَوُا الْفَضْلَ بَيْنَكُمْ. وأنا قاعد إمبارح في التصوير افتكرت الرحلة و الشقى و التعب من أول عمل لحد العمل اللي بصوره دلوقتي، و افتكرت صعوبة الحصول على فرصة عشان الواحد يثبت نفسة ويحقق أحلامه، فطبعا افتكرت أخويا و صاحبي الجدع الطيب الخلوق اللي دعمني من أول لحظة و كان سبب في اللي أنا فيه دلوقتي".

وأضاف محمد سامي: "تامر قدملي كل الدعم و الحب و الامكانيات اللي خلتني اثبت نفسي وبالذات في وقت كان صعب الشباب ياخد في الدراما فرصة بحجم مسلسل آدم، فاكر اني الكل كان رافض اني اخد الفرصة دي ومستكبرينها عليا الا هو وقف في ظهري كأنه بيحارب لأخوه، و بصلي مرة والظروف كلها ضدي و كنت حاسس وانا بحضر انهم هيجيبوا حد غيري و قاللي ده مسلسلك و هتعمله و هتنجح و هتنجحنا معاك، حتى طريقته المتواضعة و هو بيقوللي مسلسلك كأني عامل تسع مسلسلات قبله تحسس الواحد بنفسه و أهميته".

واختتم محمد سامي رسالته قائلا: "أشهد أمام الله إنك طول عمرك متواضع و مؤدب وتطلب الحاجة باحترام، ومع الكرو محترم وعشان كده كلنا روحنا فيك، بحبك يا صاحبي و تستاهل كل حاجة حلوة يا أجمل قلب، ويا رب يرزق كل الناس باللي يساعدهم على تحقيق أحلامهم زي ما رزقني بتامر حسني".