فريدة الشوباشي: ربنا ميز المرأة بالرحم ولولا وجودها مكنش هيبقا في رسل

حلت مساء أمس الكاتبة والصحفية فريدة الشوباشي ضيفة على برنامج "أم العروسة مع شيرين قباني" المذاع على شاشة قناة الحدث.
وكشفت فريدة الشوباشي خلال اللقاء عن كونها كامرأة وزوجه سياسيه، وقالت: " شغلى في السياسة لم يؤثر على بيتي لأني متزوجه من رجل سياسي وهو على الشوباشي، وانا كنت سياسية بالفطره وبحب احكيله لما بنزل المظاهرات، وكنت صغيرة ومندفعه".
وتابعت فريدة الشوباشي حوارها عن حقوق المرأة وقالت: " المرأة حقوقها ربنا اللي بيجيبهالها وقال في كتابه خلق الأنسان مقلش الرجل ولا المرأة، وربنا ميز المرأة بوجود الرحم، هل كان هيبقا في رسول لو لم تلده امرأة".
وكشفت فريدة الشوباشي لأول مرة عن كواليس اعتناقها الأسلام وسر حبها الشديد لزوجها وقالت: " أنا مش ضد الدين أنا حبيت على الشوباشي لأن كنا بنشتغل سوا هو كان زي القمر وكل البنات بيحبوه، وقولت مستحيل ياخد باله مني، وفي الوقت دا كنا بنتكلم وحسيت انه مهتم بيا بسبب صراحتي".
وتابعت: " وفي يوم قالى انا مسافر مع العقيد كمال رفعت من الظباط الاحرار علشان رايح مع الفدائين، طبعا اتجننت وحبيته اكتر، وكنت بستني جواباته، ولما رجع اعترفلي انه معجب بيا، وقالى ممكن الاعجاب يتطور لحب، ماردتش عليه".
وأضافت: " ومن هنا بدأت الحكاية مع عيلتي لأن أبويا صعيدي وأمي فلاحه وانا حبيته وهو دا اللى انا عيزاه ومفكرتش في قصة اختلاف الدين، وقابلت مشاكل كتير وتهديدات من أهلى علشان هو مسلم، وقولتلهم سبوني احاول انساه، وجبولي عريس ، وعلى كان قايلي لو جبولك عريس قولى طيب وبعدين نهرب".
واستكملت قصة حبها وقالت: "اعدت مع ابويا وقولتله ليه عايزني ابقا خاينة ليه اتجوز واحد مش بحبه ورفض، بعدها مشيت على المنصورة مع علي الشوباشي واتنين صحابنا محامين عملولنا عقد زواج مدني لاني كمان كنت قاصر 19 سنة، وبعد الجواز اهلى خطفوني علشان اسيبه".
ووجهت نصيحة للشباب بالأنتاج وترك الأفكار البالية وانتج لبلدك ونفسك.
واختتمت حديثها قائلة: "على الشوباشي حبيب العمر ولحد الأن لبسه دبلته، وباخد رأية في كل حاجة قبل ما اعملها كأنه عايش".