ياسر جلال يكشف سبب حريق ديكور ”جودر”

كشف الفنان ياسر جلال كواليس تعرض ديكور مسلسله "جودر: ألف ليلة وليلة" لحريق منتصف مارس الماضي.

وقال ياسر جلال خلال لقائه ببرنامج "الراديو بيضحك" من تقديم فاطمة مصطفى عبر إذاعة "الراديو 9090": "الحريقة اللي حصلت في الاستديو كان المفروض في فرن وأستاذ إسلام خيري المخرج عايز يعمل مشهد العيش بيطلع طازة، عشان المصداقية، إحنا لما بنولع شمعة معانا الدفاع المدني بيقولولنا نعمل إيه، قبل ما يعمل المشهد دا استشار الناس اللي هناك، وحصل إننا ولعنا الفرن البلدي واتضح أن الفرن نفسه مكنش معزول وحرقت جزء اللي إحنا فيه عقبال ما قدرنا نسيطر أخدنا وقت، لكن الحمد لله أن الحريقة موصلتش لباقي الديكور".

وتابع ياسر جلال: "المفارقة إني كنت بصور مشهد الحريقة بتاع الدكان اللي اتعرض في الحلقة العاشرة وبعدها بـ3 أيام حصلت حريقة مش في الدكان في المحل اللي جنبه على طول، كانت مفارقة غريبة".

تفاصيل شخصية ياسر جلال فى"جودر"

وقدم الفنان ياسر جلال خلال أحداث مسلسل "جودر" دور "شهريار" ودور "جودر بن عمر المصري"، كان يعمل في دكان والده يبيع أقمشة لكن بسبب حقد شقيقه الأكبر "سالم" خسر كل شيء بعدما حرق له الدكان.

مسلسل "جودر: ألف ليلة وليلة" تكون من 15 حلقة وعرض في النصف الثاني من شهر رمضان 2024.

صناع مسلسل "جودر"

ومسلسل "جودر" مستوحى من حكايات ألف ليلة وليلة، بطولة ياسر جلال، نور اللبنانية، ياسمين رئيس، أحمد فتحى، هنادى مهنا، وفاء عامر، عبد العزيز مخيون، علي صبحي، وليد فواز، ياسر الطوبجي، أحمد كشك، عايدة رياض، جيهان الشماشرجي، محمود البزاوى، مجدي فكري، وتأليف أنور عبد المغيث، وإخراج إسلام خيرى وإنتاج شركتى ميديا هب سعدى – جوهر، وأروما للمنتج تامر مرتضى.