أمير مرتضى: أيمن عباس يتجهز لـ رئاسة نادي الزمالك.. ووالده حاربنا كتير

كشف أمير مرتضى، المشرف السابق على الكرة بنادي الزمالك، تفاصيل مكالمته المسربة مع شقيقة أحمد، مؤكدًا أنه لا يعلم كيف تم تسريب المكالمة، كما أنه تم اللعب بالمكالمة بالمونتاج حتى يظهر هجومهم فقط، بجانب الحديث عن ممدوح عباس رئيس نادي الزمالك الأسبق.

وقال أمير مرتضى، خلال استضافته ببرنامج "أسرار" مع الإعلامية أميرة بدر المذاع على قناة النهار: " المكالمة بيني وبين أحمد أخويا كانت 35 دقيقة واتكلمنا في أكتر من حاجة، واللي اتسرب كان 3 دقائق وكان فيهم حاجات اتقصت علشان يبان أن في ناس بتشتم ناس، وجزء في المكالمة كنت بقنع أحمد أنه مينزلش انتخابات أصلًا، هو بيثق فيا وبيسألني قبل غلق باب الترشيح على نائب رئيس بيوم، وأنا كنت بقنعه أننا نسيب النادي وبابا يركز في شغله معانا والنادي بيستهلكنا، وكان في كلام في النص إيجابي أن نرجع ونظبط كل حاجة ناخد بطولة ونمشي وإحنا في عز المجد.

وتابع: وفي الآخر لو المكالمة دي مكنش فيها شتايم مكنتش اتسربت، وأنا مش عارف اتسربت إزاي، وأنا متكلمتش في أعراض ولا ذمة حد، ولا قولت على حد حرامي ومرتشي، وأنا كنت شايف ناس مش مناسبين.

أكد أمير مرتضى، أن ممدوح عباس شن حربًا على عائلة مرتضى منصور، كما أن رجل الأعمال أيمن عباس يتجهز في الوقت الحالي لرئاسة القلعة البيضاء، قائلًا: في كتير جوا نادي الزمالك بيحاربوا عيلة مرتضى منصور، زي أستاذ ممدوح عباس، وأنا بحب وبحترم أيمن عباس، ومش عارف هو داخل في الصراعات دي ولا لأ، ولكني عارف هو بيحضر نفسه دلوقتي لحاجة تانية هتبقى موجودة في الزمالك وده حقه، هو بقاله فترة بيتحضر لـ ده علشان يبقى متولي رئاسة نادي الزمالك، وهو بني آدم محترم، ومقدرش أحكم عليه هيبقى عامل إزاي في الرياضة، لكن أستاذ ممدوح عباس لأ وكنا هننزل درجة تانية.

وأضاف: ممدوح عباس لا يصلح لـ رئاسة نادي الزمالك، وكل واحد بياخد فترته وزمنه وهو خد فترته وزمنه بمجلس كامل، وكان عنده كل الأدوات أنه ينجح، قعد 4 سنين وكل الكوارث اللي ممكن تحصل على مستوى عقود وصفقات ورعاية وخناقات وصراعات حصلت، مش معنى أنه مشجع زملكاوي أنه يصلح يبقى رئيسه.

وعن محاولات الصلح بين والده المستشار مرتضى منصور، وممدوح عباس، فعلق أمير مرتضى: أستاذ عمرو الجنايني وأستاذ مدحت العدل، لما كنت حلقة الوصل قولت إيه رأيكم نجيب أستاذ ممدوح عباس، ونصالحه على المستشار مرتضى منصور، ويتنازل عن القضايا بتاعة الحجز على الأرصدة ويتبرع للنادي، بدل ما بيصرف كل الفلوس دي علشان يمشينا يصرفها على النادي، وهعمل له تمثال في النادي والمبنى اللي كان فيه هسميه بـ اسمه، وهسمي ملعب بـ اسمه وهعمل له اللي هو عايزه.

وأردف: ممدوح عباس عمل عملية كبيرة في المخ، ودخلت له أوضة العمليات وسلمت عليه وبوسته وألف سلامة عليك، ومحدش يعرف الكلام ده ودي حاجات إنسانية، وهو قعد يهزر معايا والسن له احترامه، وكان ساعتها المستشار مرتضى في السجن وقالي روح زور ممدوح عباس علشان عامل عملية، رغم أن هو في السجن وماحدش زاره.

واختتم: ممدوح عباس بيحاربنا الحرب دي، لأنه شايف أن المستشار مرتضى منصور أخد مكانه، مع أن المستشار عضو مجلس إدار من سنة 1992، وأستاذ ممدوح عباس بيتعامل أنه مشجع زملكاوي من سنة 1972، وهو صرف كتير أوي على الحرب دي، صرف على إعلاميين وسوشيال ميديا وناس بتطلع لايف وخدنا عليهم كلهم أحكام زي عبد الناصر زيدان، واتنازلنا عنهم، وعبد الناصر زيدان راجل محترم وقال للمستشار سامحني أنا اتزقيت أني أغلط في حقك.

برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.