أمير مرتضى منصور: أشرف بن شرقي مجددش مع الزمالك لأنه مكنش قادر يقعد في مصر

علق أمير مرتضى، المشرف السابق على الكرة بنادي الزمالك، على أزمة عدم تجديد عقد اللاعب أشرف بن شرقي، وأزمة إمام عاشور مع الزمالك، بجانب الكشف عن كواليس شرائه زيزو.

وقال أمير مرتضى، خلال استضافته ببرنامج "أسرار" مع الإعلامية أميرة بدر المذاع على قناة النهار: " أنا جبت لاعيبة كتير، زي زيزو جبته بـ 200 ألف دولار ووقتها كان بـ 3 مليون جنيه، وكان عنده مشكلة في البرتغال ولازم يرجع مصر، وفي وكيل اسمه محمد حبشي رشحه ليا، وزيزو مكنش معروف على الساحة الرياضية والمدير الفني مكنش مهتم بالتعاقد معاه، وآخر عرض جاله من السعودية واترفض كان بـ 8 مليون دولار.

وتابع: جيبت أشرف بن شرقي من الهلال السعودي اللي هو زعيم أسيا وعندهم نيمار دلوقتي، وجبته بـ 400 ألف دولار ووقتها كان بـ 6 مليون جنيه، وساعتها نادي الوداد المغربي باعوا بن شرقي لـ الهلال السعودي بـ 4 مليون يورو، وأشرف معرفش يتأقلم مع الأجواء السعودية.

وعن سبب عدم تجديد عقد أشرف بن شرقي، مع نادي الزمالك، فعلق أمير مرتضى: أشرف بن شرقي، جه الزمالك في صيف 2019 والموسم ده بيبقى اسمه موسم 2019/2020، وهو مضى 3 مواسم، ولعب معايا موسم وبعدين المجلس اتحل وقعدنا سنة في البيت بنتفرج على الزمالك في التلفزيون، ولما رجعت كان فاضل له 6 شهور في عقده ويخلص، وهو جه قالي أنا مش عايز أقعد في مصر، ولو قعدت في مصر هقعد في الزمالك، وعلشان خاطري سيبني أمشي، ومتطلعش تصرح وتدي أمل للناس أني احتمال أجدد لأني زهقت وعايز أمشي، وده لاعيب مغربي وعاش في أجواء تانية خالص، عاش في السعودية وفرنسا.

أما عن أزمة إمام عاشور: مين اللي جاب إمام عاشور الزمالك وهو مش معروف؟ أنا جبته وهو لاعب في غز المحلة ومُعار لنادي حرس الحدود، وساعتها كان عنده 20 سنة ولما جيت أعرض على المجلس أن ده لاعيب هيبقى أحسن لاعيب في مصر، وسعره كان 12 مليون جنيه وكل الناس أستائت أنت عايز تجيب لاعيب عنده 20 سنة بـ 12 مليون جنيه؟ أنا حاربت عليه ومضى 5 سنين لأنه ناشئ ومنورش غير في السنة التالتة، والسنة الرابعة أنا رجعت الزمالك تاني وبقى فاضل سنة في عقده.

وأضاف: أنا مشكلتي أني مكنتش صريح مع الناس، وأنا لو كنت رجعت في ولايتي التاني وسودتها في وش الناس، وطلعت وصارحت الرأي العام وعملت زي اللي بيعملوه دلوقتي، وبقيت أنا اللي شايل مسؤولية أني أقنع اللاعيبة تقعد، اللاعيبة دي اتحطت في صراع بين مستقبلها، دول بيبقوا مستنين اللحظة اللي يجددوا عقدهم فيها لأن دي بتضمن له رزقه لـ 3 سنين قدام، وبيتفق على رقم لـ رزقه لـ 3 سنين قدام، فبيدخل في صدام.

برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.