أمير مرتضى منصور: أعداء والدي طلعوا شائعة أني باخد عمولات على صفقات الزمالك

رد أمير مرتضى منصور، المشرف السابق على الكرة بنادي الزمالك، على اتهامات امتلاكه شركة تُحصل عمولات من صفقات نادي الزمالك.

وقال أمير مرتضى من خلال تصريحات تليفزيونية: " الكلام ده اتقال عليا سنة 2015 من قبل ما أمسك الزمالك، أنا مسكت الزمالك سنة 2018، سنة 2015 دي كنت ابن رئيس نادي الزمالك وبساعد من بعيد لو عايزين يتفاوضوا مع مدرب ولكن مش بطريقة رسمية، علشان لو متمتش متتحسبش على النادي.

وتابع: لما طلع عليا الإشاعة دي مكنتش لسة ماسك حاجة، وقولت أنا عمري ما كان عندي شركة ولا مشارك في أي نشاط ولا مساهم في أي شركة، وقانون الشركات بتبقى مدرجة في هيئة معينة وأنا عمري ما كان عندي حاجة زي دي، وده كان نوع من الصراعات لأن والدي المستشار مرتضى منصور عنده أعداء وخصوم واتهموني.

وعن حيققة مشاركته أحمد يحيى وكيل اللاعبين، فعلق أمير مرتضى: أحمد يحيى وكيل اللاعبين وهو وكيل أهم لاعيبة في مصر في الأهلي والزمالك، وهو شاطر وعنده لاعيبة مميزة، وهو بيشتغل مع الأهلي والزمالك، واشتغل في الزمالك من قبل ما أنا أجي وبعد ما أنا مشيت، لو أنا مشارك أحمد يحيى مع احترامي له مستحيل أنكر علاقتي به، وأنا عندي معيار اللي هيجيب اللاعيب اللي أنا عايزه بأقل رقم هو ده اللي هتعامل معاه تاني.

وأضاف: اللاعيبة مكنتش بتيجي بفلوس من تحت الطرابيزة، الفلوس كانت بتطلع من نادي الزمالك لـ النادي اللي بنشتري منه اللاعب، وبتطلع من الزمالك في حساب اللاعب.

وأردف: أحمد يحيى تعاملت معاه من قبل ما أجي الزمالك في 3 لاعيبة وهما طارق حامد والونش ولاعيب كمان، وهو كان الوكيل بتاعهم ولما جيت توليت المسؤولية في 2018 حصل بيني وبين أحمد يحيى ومنعته يدخل النادي لمدة سنتين.

واستكمل: أحمد يحيى بلاك ليست في الزمالك، علشان خد أحمد الشناوي الجون بتاع الزمالك ومضاه في الأهلي، وأنا عرفت الموضوع ده وبعد كده أحمد الشناوي انتقل لـ بيراميدز، ولما رجعت في ولايتي التاني أحمد يحيى جابلي ناصر منسي، ومروان عطية وراح الأهلي، ولو في وكيل أنا خدت منه جنيه أو أنا عزمته على كوباية شاي يقدم فيا بلاغ.

برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.