حلمي عبدالباقي عن أغنية روبي «3 ساعات متواصلة»: أي حد عايز التريند يبقي في منطقة الجدل

علق الفنان حلمي عبدالباقي وكيل أول نقابة المهن الموسيقية علي الكلمات المستخدمة في الأغاني الشعبية ، موضحا رأيه في كلمات أغنية روبي ( 3 ساعات متواصلة ) ، التي أثارت جدلا واسعا خلال الفترةً الماضية علي مواقع التواصل الاجتماعي.

وقال حلمي عبدالباقي عبر لقائه في برنامج ( ورقة في ملف ) المذاع علي قناة النهار مع الإعلامي هيثم بسام : الموضوع قبل عن البدايات في المهرجانات ، والنقابة عملت تهذيب للقصة دي ، وجبنا الناس وقولنا لهم وأنتوا بتمثلوا الفن المصري ، ولما بتخرج برا مصر بتمثل مصر ، لأن الكلمة بشكل عام لما بتدخل بيتي بتأذيني ، وبتأذي مشاعر مراتي وولادي .

وأضاف : بداية الأولاد دول بجد كانت وحشة جدا والألفاظ مباحة جدا ومفيش رقابة ووجود السوشيل ميديا أعطي فرصة لأي حد يقول اللي عايزه ، واحنا في جيل التسعينات كنا بنحافظ علي مشاعر الناس وعائلتهم وعقليتهم ، وكان فيه رقابة علي الكلمات ، وبعدين بنسجل وبنبعته تاني بعد ما غنينا ، وفي وجود السوشيل ميديا مبقاش فيه رقابة ، والمفروض كل إنسان عنده رقيب .

أما عن أغنية ( 3 ساعات متواصلة ) لروبي ، قال : كلام روبي مش عادي بصرف النظر عن إني عضو نقابة ، وإحنا كدة بنتحايل علي الأغنية لما نشوف الكلمات اللي بعدها ، وأي حد عايز يبقي تريند يبقي في منطقة الجدل ، ومن وجهة نظري الشخصية ده بيحصل دلوقتي قصد ، ودلوقتي معروف أي حد بيبقي في منطقة الجدل بيكون تريند .

واختتم حلمي حديثه ، قائلا : إحنا خرجنا عن المسار ولكن مش مطلوب إننا نطلع نغني تراث والمفروض نغني تطور المزيكا والكلمة ومش مطلوب مني أجرح في حد ، ولا مطلوب من أي مطرب أو مطربة تطلع تغني تراث ولكن تحترم عقلية المشاهد أو المستمع ، وكل شئ اتغير مش الفن بس وكل حاجات زمان شبه مبقتش موجودة دلوقتي ، وده يرجع لانتشار السوشيل ميديا بشكل فظيع .