فيديو مخل و20 ألف جنيه.. اعترافات صادمة لقاتلة صديقتها بالقليوبية| نص تحقيقات

ضحية القليوبية .. لقب أطلقه الأهالي على سيدة تدعى "ن.ع"، بعدما لقت مصرعها بصورة بشعة على يد صديقتها ونجليها بعد محاولتهم سرقة مصوغاتها الذهبية.

انكشف الستار عن الجريمة بعد العثور على جثة السيدة في أعقاب اختفائها لمدة تزيد عن أسبوع حتى وجدها الأهالي عارية وملقاة بإهمال بإحدى مقالب القمامة في القليوبية والحيوانات الضالة تنهش في جسدها.

وتنشر "النهار المصرية"، نص التحقيقات في القضية 7905 لسنة 2023 جنايات مركز قليوب، والمقيدة برقم 662 لسنة 2023 كلي جنوب بنها.

وننشر أقوال "ن.م"، 39 سنة، المتهمة الرئيسية في القضية، والتي اعترفت بإزهاق روح صديقتها بعدما ابتزتها الأخيرة بمقطع فيديو مخل لها، فقررت الأولى قتلها وسرقة مصوغاتها الذهبية.

وقالت المتهمة: "أنا كنت عايشة مع أبويا وأمي وكانت حالتنا المادية صعبة لدرجة أني كنت بنزل أشتغل في البيوت وأنا عندي 8 سنين لأن أبويا كان محبوس في قضية مخدرات وبعد كدة اتجوزت عشان أهرب من بيت أبويا وكنت فاكرة اللي هتجوزه ده مرتاح ماديًا لكنه طلع معهوش فلوس وقاعد في البيت مش شغال فرجعت أشتغل تاني في البيوت والديون بدأت تزيد عليا لحد ما اضطريت أشتغل في الدعارة".

وأكدت: "أنا عرفت المجني عليها عن طريق واحدة اسمها أم خالد ماتت محروقة من يومين وكانت صاحبة البيت اللي إحنا الاتنين شغالين فيه وبتتعامل على أنها أهم واحدة في المكان وبدأت تتكلم معايا لكني عرفت أن أم خالد صورتني وأنا في وضع مخل وبعتته للمجني عليها عشان تهددني أنها هتوريه لجوزي لو مكملتش شغل معاها ونفذت طلباتها".

وأوردت: "اللي أعرفه إن المجني عليها مرتاحة ماديًا عشان هي دايما لابسة دهب والمحفظة بتاعتها مليانة فلوس وأنا من ضيق الحال وقلة الفلوس وكتر الديون جه في بالي أني أسرق الحاجة اللي معاها وفكرت في كدة أنا وابني الكبير وصارحته أني مزنوقة في فلوس والمجني عليها بتهددني بفيديو مخل ليا معاها على التليفون وأن الدهب اللي معاها عامل 20 ألف جنيه وقلتله إننا لازم نخلص عليها".

وتابعت: "أنا قولت لبنتي الصغيرة أننا هنجيب المجني عليها وناخد فلوسها وهنمشيها، وبعد كدة كلمت الضحية وقولتلها أنا أعرف واحد أجنبي عاوز واحدة وهيدفع اللي تطلبيه فهي طلبت 5 آلاف جنيه واتفقنا أن هي هتاخد 3 آلاف وأنا هاخد ألفين جنيه".

وأردفت: "لما جت عندي البيت عرفتها بابني الكبير على أنه الراجل الأجنبي وقعدنا شوية وهي دخلت أوضتي وبعدها ابني دخل كتفها وشل حركتها ونده عليا وقالي تعالي بسرعة وأنا روحت جبت قماشة مبلولة وكتمت بيها نفسها لحد ما ماتت".