زوج في دعوى نشوز: ”مراتي فاكرة نفسها رامز جلال وولعت في الشقة”
لمقالب الفنان رامز جلال تأثير كبير في الشارع المصري والعربي بسبب قوتها، وأحيانا لتصورنا استحالة حدوثها، فهو يتبع كل عام طريقة جديدة لعمل مقالب في أصدقائه من الوسط الفني ونجوم كرة القدم، وعلى نفس طريقة رامز جلال قررت "ميار" عمل مقلب في زوجها كل ليوم بعد عودته للمنزل بعد يوم عمل شاق، وتكرار نفس المقالب مع الجيران والأصدقاء لتسلية يومها خلال غياب زوجها أو انشغاله.
بدأ "شديد"، يروى تفاصيل معاناته مع زوجته أمام محكمة الأسرة بالتجمع الخامس قائلًا: "اتجوزت مراتي عن حب بعد خطوبة سنة، مراتي بنت عمي وعمري ما شوفت منها أي حاجة غريبة، لكن الصدمة كانت بعد الجواز، اكتشفت إني اتجوزت رامز جلال وجبته في البيت".
وتابع الزوج بعيون قلقة: "كانت بتتظاهر أنها بتحبني وكنت بنفذ ليها كل طلباتها، لكن بدأت تصرفاتها تبقى غريبة، وأرجع من الشغل الاقيها عملت كارثة مع حد من الجيران وتقولي مقلب، شايفة إن الموضوع مضحك مفيش أي مشكلة فيه، حذرتها أكتر من مرة توقف تصرفات العيال دي ولكنها كانت مصممة تكمل وكل يوم مصيبة".
وأكمل الزوج: "ابقى قاعد في الشقة بعد ما أرجع من الشغل، وهي تخرج تقعد على السلم علشان تعمل مقالب في الجيران، طلبت منها تهتم بالبيت وتشغل وقتها وتسيبها من لعب العيال وهي مش سامعني".
وأردف الزوج: "قررت أقعد معاها عند أهلها، يمكن تخاف منهم، لكنهم طلعوا متعودين والجيران هناك بتترعب من مقالبها، رجعنا البيت و حبستها في الشقة علشان متعملش مقالب في حد تعمل مشكلة، حاولت تهرب أكتر من مرة معرفتش، رجعت في يوم لقتها ولعت في الشقة وتقولي مقلب، هربت على بيت أهلها ورفضت ترجع".
واختتم الزوج حديثه: "كل محاولات الصلح فشلت فأقمت دعوى نشوز تحمل رقم 1328 لسنة 2021، مراتي ولعت في الشقة وبتتشرط وعايزة ترجع علي شقة جديدة وعفش جديدة".