انفراد… ”مش بضربها غير لما تغلط”.. شهادة والد المتهمة بقتل شقيقتها بالهرم
حصلت "جريدة النهار المصرية"، على نص تحقيقات واقعة مقتل طفلة بـ 3 طعنات بالرقبة، وإصابة أخرى إثر خنقها بـ"إيشارب" على يد شقيقتهما الكبرى بمنطقة كفر الجبل في الهرم.
وننفرد بنشر شهادة "ياسر"، والد المتهمة "ه" والمجني عليهما "ح"، 5 سنوات، و"ح"، 11 عامًا، والذي كشف تفاصيل واقعة مقتل ابنته الصغرى وإصابة الأخرى على يد شقيقتهما.
س/ ماهي صلتك بالمجني عليهما؟
ج/ هما بناتي.
س/ ما هي صلتك بالمتهمة؟
ج/ بنتي.
س/ ما هي معلوماتك بشأن الواقعة محل التحقيق؟
ج/ اللي حصل أني كنت في الشغل وجالي تليفون من بنتي الكبيرة بتقولي أنت فين يا بابا تعالى بسرعة فيه حد دخل علينا البيت وأخواتي واقعين على الأرض وحبيبة بتنزف دم، فأنا روحت بسرعة البيت عشان أفهم فيه إيه وأول ما روحت لقيت زحمة وعرفت أن "ه" قاعدة عند جدتها قبلينا بكام بيت، وسألتها إيه اللي حصل قالتلي انها كانت في البلكونة وفجأة لقيت باب الشقة مكسور وأختها الوسطانية مرمية على الأرض وملفوف حوالين رقبتها طرحة وأختها الصغيرة سايحة في دمها، فروحت على المستشفى لقيت بنتي قالتلي أن أختها هي اللي عملت فيها كدة ولقيت بنتي التانية اتوفت.
س/ وما الذي أخبرتك به نجلتك تحديدًا؟
ج/ قالتلي أن فيه حد دخل عليها البيت هي وأخواتها الصغيرين وهي كانت في البلكونة ولقت أختها واقعة على الأرض وأختها التانية سايحة في دمها.
س/ وما الذي أخبرتك به نجلتك المجني عليها تحديدًا؟
ج/ قالتلي إن أختها الكبيرة هي اللي عملت كدة، وقالتلي إنها كانت بتلعب معاها استغماية وحطت التحجيبة على عينها وبعدها نزلتها على رقبتها وكانت بتحاول تخنقها عشان مكانتش عاوزاها تدخل الأوضة عند أختهم الصغيرة.
س/ هل تعاني نجلتك الكبرى من ثمة أمراض نفسية؟
ج/ لا بالعكس هي عاقلة.
س/ هل كانت توجد خلافات بين المتهمة والمجني عليهما؟
ج/ لا هما كانوا كويسين جدًا مع بعض.
س/ وهل كانت علاقتك بنجلتك المتهمة جيدة؟
ج/ أيوا علاقتي بيها كانت كويسة جدا ومكنتش بفرق في المعاملة بينها وبين أخواتها.
س/ وما قولك فيما قررته نجلتك المتهمة بأنك دائم التعدي عليها بالضرب المبرح؟
ج/ أنا مش بضربها غير لما بتغلط.
س/ بماذا تعلل قيام ابنتك بقتل شقيقتها ومحاولة قتل الأخرى؟
ج/ معرفش هي عملت كدة ليه ومتفاجئ من اللي عملته.
س/ ما قولك فيما هو ثابت بتقرير الطب الشرعي الخاص بابنتيك بأنهما مصابتان باحمرار وكدمات بفتحة الشرج؟
ج/ أنا بناتي بيحبوا ياكلوا شطة كتير وأكيد ده سبب الاحمرار اللي عندهم.