انفراد… ”تعالي نلعب استغماية”.. ماذا قالت قاتلة شقيقتها بالهرم أمام النيابة؟
حصلت "جريدة النهار المصرية"، على نص تحقيقات واقعة مقتل طفلة بـ 3 طعنات بالرقبة، وإصابة أخرى إثر خنقها بـ"إيشارب" على يد شقيقتهما الكبرى بمنطقة كفر الجبل في الهرم.
وننفرد بنشر نص التحقيق مع المتهمة "ه"، 14 عامًا، بعد اعترافها بإزهاق روح شقيقتها الصغرى "ح" صاحبة الـ 5 سنوات، وخنق شقيقتها الوسطى "ح"، 11 عامًا، بسبب خلافات بينهم.
وإلى نص التحقيقات:
س/ ماهي ظروف نشأتك الاجتماعية؟
ج/ أنا عايشة مع ماما وبابا في بيتنا اللي في كفر الجبل وطالبة في الصف الثاني الإعدادي، وعندي أختين أصغر مني، وعايشة مبسوطة معاهم وبحبهم ومفيش بيننا مشاكل إلا لما بعمل حاجة غلط أبويا بيضربني بس مش جامد والخناقات العادية بين الإخوات.
س/ ما تفصيلات إقرارك؟
ج/ اللي حصل أني كنت جاية من المدرسة مخنوقة جدًا بسبب إن زميلاتي كانوا مرخمين عليا جامد ولما روحت بابا طلب مني أحضرله الأكل وأنا حضرته، ونزل بعد كدة اخواتي ضربوا بعض و"ح" جت اشتكلتلي فأنا زعقت لأختي الصغيرة فزعقتلي وشتمتني، وأختي الوسطانية قامت جابت أكل وقعدت في الصالة وبعدها أختي الصغيرة دخلت أوضة النوم وحدفت عليا السكينة روحت أنا مسكت السكينة وخبطها في رقبتها 3 مرات وكانت هي نايمة على السرير.
س/ وما الذي حدث في أعقاب ذلك؟
ج/ أختي الوسطانية ندهت عليا من برا وهي بتاكل عشان تشوفني أنا وأختي الصغيرة بنعمل إيه روحت خرجت من الأوضة وقفلت الباب ومنعت أختي تدخل الأوضة فراحت ناحية الشباك علشان تنادي على أمي فقلتلها تعالي نلعب متناديش ماما وجبت طرحة ولفيتها حوالين عنيها وبعدها نزلتها على رقبتها عشان أخنقها ويغمى عليها وبعدها جريت على الباب ونزلت على السلم وندهت ماما قلتلها إن فيه حرامية دخلوا الشقة وقتلوا أختي وخنقوا أختي التانية وأنا كنت في البلكونة وصوت التلفزيون كان عالي وأمي صدقتني وجرينا في الشارع وبعدها اتقبض عليا.
س/ وما مضمون الحوار الذي دار بينك وبين شقيقاتك؟
ج/ أختي الوسطانية جت اشتكت ليا من أختي الصغيرة وأنا زعقت لها وهي جت شتمتني وزعقتلي.
س/ وما هي الأفعال المادية التي ارتكبتها ضد شقيقتيك؟
ج/ أنا ضربت أختي بالسكينة في رقبتها 3 مرات عشان كنت راجعة من المدرسة مخنوقة، وخنقت أختي التانية بالطرحة لحد ما اغمى عليها.
س/ وما سبب قيامك بخنق حلاوتهم؟
ج/ خفت لحسن تنادي على ماما وماما تيجي تضربني وقلت في نفسي هيغمى عليهم الاتنين ولما يصحوا هيكونوا نسيوا اللي حصل مكنتش أعرف إن حد منهم ممكن يموت.
س/ هل من ثمة مقاومة بدرت من أي من المجني عليهما؟
ج/ لأ.
س/ ما قولك بما ثبت بالتقرير المبدئي من مستشفى الهرم بأنه يوجد احمرار وكدمات بفتحة شرج شقيقتك الصغرى.
ج/ ماعرفش أنا مضربتهاش غير في رقبتها.
س/ ومن أين استحصلتي على أدوات الجريمة؟
ج/ السكينة أختي الصغيرة جابتها من المطبخ وحدفتها عليا، والإيشارب كان على الكنبة اللي في الصالة.
س/ هل تعاني من ثمة أمراض نفسية؟
ج/ لأ.
س/ هل أنتِ معتادة التعدي على شقيقتيك بالضرب؟
ج/ لأ.
س/ هل من ثمة خلاف بينك وبين والديك؟
ج/لا أنا بحبهم.
س/ وما هو قصدك من ارتكاب الواقعة؟
ج/ أنا مكنتش قاصدة أموت حبيبة، أنا كنت عايزاهم يغمى عليهم بس ويصحوا ناسيين اللي حصل.