يسري الجمل: الذكاء الاصطناعي يختصر التنفيذ ولا يعوض الخبرة البشرية

أكد الدكتور يسري الجمل، وزير التعليم الأسبق، أن الذكاء الاصطناعي أصبح أداة أساسية لرواد الأعمال والشركات الناشئة، لكنه لا يمكن أن يحل محل الخبرة البشرية وبناء الثقة والحكم على الأشياء.

وقال الجمل خلال كلمته: «يكون عندك شركاء، لكن بيسموهم الفريق الافتراضي، موجود عندك شركاء وناس بتشتغل، بس بيشتغلوا افتراضيًا، فبقى عندك فريق كامل معاك».

وأضاف أن الذكاء الاصطناعي يساعد بشكل كبير في إنتاج الملصقات والفيديو والصور الخاصة بالشركة بسرعة كبيرة جدًا، مما يوفر وقتًا طويلًا في بداية المشروع، كما يساعد في التوافق مع المتطلبات القانونية وقواعد الضرائب وغيرها من الإجراءات، وينجزها بشكل سريع.

وتابع: «الفكرة كلها إنك توفر وقتك للعمليات كلها، ومتشتغلش بالك بيها كتير، لكن محتاجين إن مهاراتنا تبقى أفضل في استخدام الذكاء الاصطناعي».

وشدد على أن الذكاء الاصطناعي لن يقوم بكل شيء، وقال: «لازم نعرف إن في حاجات مش هو اللي هيعملها، لازم أنت اللي تعملها، أول حاجة أنت في مجال معين، عايز خبرة في المجال ده، الخبرة دي مش هتلاقيها في الذكاء الاصطناعي، هو بيشتغل سريع جدًا، بس الخبرة لو بتشتغل في مجال معين لازم تبدأ بواحد أو تسأل حد خبير في المجال ده، مش هيعوضه».

وأوضح أن الذكاء الاصطناعي يقدم مخرجات سريعة جدًا، لكن الرأي في الآخر للإنسان، وبناء الثقة هيفضل دور الإنسان، مش الآلة.

وأضاف أن عملية التنفيذ زمان كانت بتاخد وقت وعايزة ناس وموظفين وتدريب، وكل الحاجات دي تم اختصارها، ويفضل بس الفكرة والفكرة الأساسية.

ووجه نصيحة للجيل الجديد اللي عايز يبدأ شركات، مستشهدًا بنصيحة أحد كبار رجال الأعمال لشاب معاه 1000 جنيه إسترليني وعايز يبدأ شركة، حيث نصحه قائلًا: «قبل ما تفكر في أي حاجة، أول حاجة وفر كل دقيقة في وقتك، في الأول اتعلم، بعد كده ابتدي شوف هتعمل إيه بالألف جنيه».

واختتم الجمل: «لازم تعرف التفاصيل بالضبط، كل ما تعرف التفاصيل أكتر، خد كورسات، والحاجات دي بقت موجودة أونلاين كتير جدًا، بس لازم الواحد يثقف نفسه ويتعمق فيها، مش مجرد ياخدها من على الوش، لازم تبقى دراسة عميقة، وفي نفس الوقت يعرف السوق اللي هو موجود فيه، متفتكرش إنك أذكى منه، لأ أنت دايمًا أذكى، بس أنت أذكى في التنفيذ، لكن هو بيسهل بشكل كبير جدًا عملية التنفيذ».