شوبير يشيد بهالاند.. سالك من جواه مش زي لاعيبتنا
أشاد أحمد شوبير حارس مرمى الاهلي ومنتخب مصر السابق بتصرف إيرلينج هالاند هداف الدوري الإنجليزي ومهاجم مانشستر سيتي مع الدولي المصري عمر مرموش زميله في الفريق خلال مباراة كريستال بالاس.
قال أحمد شوبير: إمبارح كنت بتفرج على مباراة مانشستر سيتي مع كريستال بلاس ولما بشوف مرموش قلبي بيرفرف خاصة مع اقتراب رحيل محمد صلاح عن الدوري الإنجليزي بعد ما عمل كل شيء على مدار 9 سنوات.
وأوضح شوبير: ايه قصة هالاند ومرموش؟، الماتش اللي فات مرموش جاب جون أمام برينتفورد فهالاند جري بيه عشان يحتفل مع الجمهور، وامبارح كان هالاند هداف الدوري الإنجليزي احتياطي ولعب مرموش أساسي فتقدم سيمينيو وبعدين مرموش جاب الجون الثاني، فالمخرج جاب الكاميرا على هالاند وشه منور زي البدر وبيضحك ومبسوط ولما مرموش خرج هالاند يقوم ياخده بالاحضان ويخلي الجمهور يصفق له رغم إنه لعب على حسابه ومكانه. وتابع حارس الأهلي السابق: بقول كده ليه عشان عندنا في مصر اللاعيب ييجي يخرج تلاقي الحاجات طارت والدنيا ولعت والوش بوز، أنت حضرتك قارن نجوميتك بهالاند، هو متصالح مع نفسه يا باشا سالك من جواه.
وأضاف شوبير: ومرموش كمان سالك من جواه عشان كده لما بيجيب جون تلاقي الناس كلها فرحانة به ده اسمه الرضا وحالة الجماعية في الفريق لكن هنا اللاعيب يخرج يشوط برجله مش عارف أيه ويتخانق مع مين وتاني يوم تطلع المبررات، السلكان يا جماعة مهم قوي السلوك مهم قوي يكون صح.