شوبير ينتقد سوء التخطيط في الكرة المصرية: ”نمشي بأمزجة مش بسياسات”
شن الإعلامي أحمد شوبير هجومًا لاذعًا على منظومة كرة القدم في مصر، منتقدًا ما وصفه بـ"غياب السياسات الواضحة" و"هيمنة الأهواء الشخصية" على قرارات الإدارة الرياضية، وذلك خلال تصريحاته عبر إذاعة "أون سبورت إف إم".
وقال شوبير:
"الكرة في مصر ماشية بأمزجة، مش بسياسات.. على حسب رغبة صاحب المحل، وكل مرة بنسمع نفس الكلام: نرغب في توسيع القاعدة، نشر اللعبة، تثبيت عدد الممارسين.. لكن الواقع مختلف تمامًا."
وأضاف:
"القرارات بتتغير حسب الأشخاص، ودايمًا صاحب القرار بيكون مفصل على مقاسه.. ده عايز هبوط، وده صعود، وده يقلل، وده يزود.. مفيش معيار ثابت، ومفيش تخطيط."
وتابع شوبير بلهجة ساخرة:
"ممنوع نادي شعبي ينزل.. ولو استثماري يهبط ويروح في داهية، مش فارقة! ليه؟ لأننا قولنا: لا اقتراب من الأندية الشعبية، هي دي السنة الحميدة."
وضرب شوبير مثالاً بوضع نادي السويس، قائلاً:
"اللي عملته فوق في الدوري الممتاز، طب ما تعمله تحت كمان، ليه السويس ينزل؟ مش برضو شعبي؟ هو الفكر بقى مبني على العاطفة مش على التخطيط!"
وختم شوبير حديثه متسائلًا عن جدوى تنظيم المباريات الأخيرة في الموسم، قائلًا:
"حد حس بقيمة وأهمية المباريات امبارح؟ مكنتش ليها لازمة.. طب حتى اعمل ساسبينس لمزيد من الإثارة، لكن مفيش إحساس بأهمية التفاصيل."