طباعة أرسال لصديق

محمد عبداللة ربيعى يكتب : مدرسة عبد العال الناظر

حنيت في مره لأيام زمان

 

و رجعت بالذاكرة عمناول

 

وإحنا في سنة أولى أول

 

في منتصف العام الدراسي

 

اخدت كتابي وكراسي

 

ودخلنا الفصل الدراسي

 

وقعدنا عالكراسى

 

الحصة الأولى لغة عربية

 

دخل الأستاذ جلال ابن الأستاذ عبد العال الناظر

 

بطريقته المضحكة المشهورة

 

ووقف وكتب عالسبورة

 

حروف شفناها قلنا يا ساتر

 

ح ب س حبس

 

حبس يا ولاد فعل ماضي

 

كانوا بيلجأوا ليه زمان عالفاضى

 

ما لهوش وجود فالأيام ديه

 

عارفين ليه

 

علشان بقى فيه ديموكراتية

 

أو من باب التغيير

 

نقدر نقول حرية تعبير

 

أحفظوا المصطلحات دية

 

حتنفعكوا في مواضيع الإنشاء

 

وجلس وقال في زهو

 

نتيجة امتحان الاملا والنحو

 

وجلسنا في منتهى الإصغاء

 

وطبعا كان هيثم ابن اللوا فلان الفلاني

 

جايب الدرجة النهائية في الامتحان الاخرانى

 

غمزنى زميلي اللي جانبي بجسمه

 

وقالي: ده مبيعرفش يكتب اسمه

 

قلتله وطي صوتك هو إحنا راح نناسبه

 

وبص ليا الأستاذ وقالي

 

أما إنت يا عبد العزيز

 

فعليك حاجات تغيظ

 

بقى يضرب فعل مضارع يا صايع

 

قلت: آمال هو أيه يا أستاذ

 

هو: طبعا يا غبي تمييز

 

أنا: ازاى يا أستاذ

 

هو: اخرس يا وغد

 

اللي حيقدر يضرب ده

 

يبقى كده اى حد؟

 

أنا: بس أنا متأكد يا أستاذ

 

هو:أنت تقول وتتأكد براحتك

 

وأنا اعمل اللي أنا عايزه

 

أنا أدرى بمصلحتك

 

******

 

وعدى الوقت وفات وجت حصة الرياضيات

 

ودخل الأستاذ هلال اخو الأستاذ جلال ابن الأستاذ عبد العال الناظر

 

وقال

 

واحد زائد واحد يساوى كام يا حلوين

 

أتنين يا أستاذ

 

الصلاة على الزين

 

شاطرين

 

درس النهار ده عن المجموع والمطروح

 

واهم حاجة يا ولاد يبقى عندكو طموح

 

يعنى أنا مثلا مش حامى مش بيت ولا قصر

 

لا أنا بحلم ازاى تكون عندي شقة فالهرم

 

وافتحها على أختها اللي في مدينة نصر

 

وأعيش بقى في براح

 

بين الغرف سواح

 

*****

 

وفى حصة اللياقة البدنية

 

دخلت الأبله منال مرات الأستاذ هلال اخو الأستاذ جلال ابن الأستاذ عبد العال الناظر

 

وقالت

 

أنا حاسيبكوا شويتين يا عيال

 

اللي عاوز يأكل واللي عاوز يشرب

 

واللي عاوز يجيب شيبسى من عند البقال

 

بس أهم حاجة تكونوا جاهزين

 

لما يجى وقت المونديال

 

ومش عاوزه اسمع حس فاهمين

 

اعتبرينا يا أبله نايميين

 

وفى حصة الأحياء دخلت الأبله هناء أخت الأبله منال مرات.......عبد العال الناظر

 

وفى حصة الفيزياء دخل الأستاذ علاء ابن مرات أخت ست بنت.......عبد العال الناظر

 

وفى حصة الكيمياء دخلت أبله رجاء بنت عم خال......أم اللي جابو الأستاذ عبد العال الناظر

 

باه هي دى مناظر

 

يا مغيث يا مغيث

 

أدى آخرة التوريث

 

دى بقت مدرسة عائلية يا ولاد الايه

 

لا تقولي نهضة تعليمية باه ولا أبصر إيه

 

من كل شجرة جايبين لنا فرع

 

وإيه يا ابن عمى

 

تحف بديعة الصنع

 

وتدوب الأيام والسنين زى الشمع

 

وفى نهاية مرحلة التعليم الاساسى

 

كان امتحان شفوي

 

في مادة الجغرافيا بالطبع

 

وكان السؤال الاساسى

 

إيه اكتر محصول بيتزرع في بلدنا كتير

 

جاوبنا في نفس واحد بدون تفكير

 

القرع