طباعة أرسال لصديق

أحمد عبدالعليم يكتب: ردودك سخيفة

 ردودك سخيفة

 

ستّ البنات

 عرّت حاجات

في نفوس ضعيفة

 

خبّي الشنب

جنب الكنَب

غمّي العيون

وإعمل كأنك مش هنا

الدقن عيرة

وياريت كمان متجيبش سيرة

ولا مين عرَف

إنهَك بصمتك وبكلامك في الشَرف

ما انتش شريف

هيّ .. شريفة

وردودك .. سخيفة !!

 

ناقش وجادل

إرفع شعار إنك مناضل

واتهم كل واحد ويّا رأيك اختلف

أو كلامه مش بيجي على هواك

إنه: ليبرالي وكافر

إنه: علماني وفاجر

إنه .. شر

إنه .. هلاك

وقول بعلو صوت وفخر

إنك ملاك

وإبدأ ناقشنا بفرض جايز يبقى صح

وأكيد غلط

إيه اللي ودّاها هناك ؟!

وليه هي كانت لابسة يومها

هدوم خفيفة ؟!

ردودك .. سخيفة !!

 

ركّز في وهم البرلمان

والثورة سيبها تتسرَق

حفـّظ غلابة البلد

يصوّتوا إزاي لصالحك

في الورَق

إكسب كمان ..

سيب المجمع يتحرَق

سيب الميدان

ليه القلق ؟!

إكسب كمان

وإدعي عليهم كلهم وقت الأدان

ولو ضميرك أنبّك

أو سؤال بنتك عليها غلّبك

أو سؤال ابنك حيبدأ يتعبك

قول صورها دي مش حقيقة

فبركة !

قول عليها مش بريئة

مش حتغلب

المهم الحزب يكسب

وقول لبنتك دي أكيد مش بنت ناس

 واللي عملوا الجيش معاها كان حلال

يضربوها بالمداس

ولو ولادك ناقشوا فيك ومصدقوش

والكلام عرّاك خلاص

غطّي نفسك بحجج

مالهاش أساس

وأدلة غامضة

قول عليهم خلّوا مصر تبقى فوضى

ولو ولادك برده لسه مصدقوش

قولهم: بس !! .. خلاص !!

دول شوية بلطجية ومأجورين

دول أشكالهم مش نضيفة

ردودك .. سخيفة !!